ज्येष्ठ नागरिक चिरञ्जीवि बास गिरीले कोभिशिल्ड खोप लगाएका करिब साढे १३ लाख ज्येष्ठ नागरिकलाई यथाशीघ्र दोस्रो डोज खोप उपलब्ध गराउने आदेशको माग गर्दै सोमबार सर्वोच्च अदालतमा रिट दायर गरेका छन् ।

अस्ति २३ फागुन देखि ३ चैत सम्म सञ्चालित खोप अभियानमा देशभरका ६५ वर्षमाथिका ज्येष्ठ नागरिकलाई भारतीय कम्पनी सेरम इन्ष्टिच्युटले विकास गरेको कोभिशिल्ड नामक खोप दिइएको थियो । उक्त पहिलो डोज लगाएको १२ हप्ताभित्र दोस्रो डोज खोप लगाउनुपर्ने भए पनि करिब साढे १३ लाख ज्येष्ठ नागरिकले दोस्रो डोज खोप लगाउन पाएका छैनन् ।

पहिलो डोज लगाएका सबै ज्येष्ठ नागरिकलाई गत १५ जेठ सम्ममा दोस्रो डोज खोप दिनुपर्नेमा अहिलेसम्म नदिएकाले ज्येष्ठ नागरिकको हक लगायतका मौलिक हक उल्लंघन भएको दाबीसहित सर्वोच्चमा रिट दायर गरिएको स्रोतले जनाएको छ ।

गिरीको रिट निवेदनमा सुनुवाईका लागि मंगलबार पेशी तोकिएको छ ।