केही खुकुलो बनाएर काठमाडौँ उपत्यकामा जारी निषेधाज्ञा एक साता थप गरिएको छ ।
उपत्यकाका काठमाडौँ, भक्तपुर र ललितपुर जिल्लाका प्रमुख जिल्ला अधिकारीको आइतबार साँझ बसेको बैठकले ११ असारसम्मका लागि निषेधाज्ञा थप गर्ने निर्णय गरेको हो ।
थपिएको निषेधाज्ञामा निजी सवारी साधन जोर/बिजोर प्रणालीमा चलाउन पाइने र बारअनुसार पसल संचालन गर्न पनि पाइने प्रावधान राखिएको छ ।
थपिएको निषेधाज्ञाको अवधिमा जोर/बिजोर प्रणालीमा ट्याक्सी चलाउने पाउने तर अन्य सार्वजनिक सवारी साधन भने चलाउन नपाइने व्यवस्था गरिएको छ ।
प्रशासन कार्यालयद्वारा जारी विज्ञप्तिमा आइतबार, मंगलबार र बिहीबार सुनचाँदी, भाँडा, विद्युतीय, घरायसी सामान बिक्री गर्ने पसल संचालन हुन पाउने उल्लेख छ साथै ती बारमा अटोमोबाइल्स र त्यसका पार्टपुर्जा पाइने पसल पनि खुल्नेछन् ।
सोमबार, बुधबार र शुक्रबार सपिङ मल, खेलकुद सामग्री पसल, कपडा र जुत्ता पसल खोल्न दिने निर्णय गरिएको छ । त्यस्तै, उक्त दिनहरूमा फेन्सी, कस्मेटिक, गिफ्ट र टेलरिङका पसल पनि खुल्नेछन् ।
उक्त निषेधाज्ञाको अवधिमा हार्डवेयर पसल दैनिक खुल्ने र अन्य बारका आधारमा खुल्ने पसललाई बिहान ११ देखि ४ बजेसम्म समय तोकिएको छ । खाद्यान्न, फलफूल र तरकारी खुल्ने समय यथावत कायम गरिएको छ ।
सीसीएमसी निर्देशक समितिको बैठकले बुधबार ‘स्मार्ट लकडाउन’ गर्ने निर्णय गरेको थियो । त्यसमा स्वास्थ्य मापदण्डलाई कडाइका साथ पालना गर्दै आर्थिक, सामाजिक गतिविधिलाई अघि बढाउने बताइएको थियो । मन्त्रालय र विज्ञसँगको छलफलपछि सीसीएमसीले बनाएको ‘स्मार्ट लकडाउन’ कै मोडल अनुसार प्रमुख जिल्ला अधिकारीहरूले निषेधाज्ञा खुकुलो बनाएका हुन् ।
उपत्यकामा १६ वैशाखदेखि जारी निषेधाज्ञा हाल आएर केही खुकुलो बनाइएको हो ।
निषेधाज्ञाको सूचना
