१९ घन्टादेखि टापुमा फसेका ४ जनाको सशस्त्र प्रहरीद्वारा उद्दार
दाङस्थित राप्ती नदीको बीचमा रहेको टापुमा १९ घन्टादेखि फसेका ४ जनाको सशस्त्र प्रहरी बलले बुधबार बिहान उद्दार गरेको छ ।
जिल्लाको लमही नगरपालिका- ७ हसनापुर र राजपुर गाउँपालिका- २ बेलास्थित राप्ती नदीको बीचमा रहेको टापुमा मंगलबार दिउँसो २ बजेदेखि फसेका उनीहरूको उद्दार गरिएको हो ।
टापुको दुवैतिर राप्ती नदी बग्ने गरेको छ । बीचमा रहेको टापुमा दिउँसो बस्तु चराउन पुगेका उनीहरू अविरल बर्षासँगै राप्तीमा बाढी आएपछि ५० वटा गाईबस्तुसँगै अलपत्र परेका थिए । उद्दार गरिएका व्यक्तिहरू लमही- ७ बस्ने वर्ष ४८ का मन्सराम चौधरी , राजपुर- २ बस्ने वर्ष ५० की सावित्री यादव, सोही ठाउँ बस्ने वर्ष २६ का राधेश्याम यादव र राजपुर- ३ बस्ने वर्ष २५ का गणेश यादव रहेका छन् ।
राती ९ बजे उनीहरू फसेको जानकारी आए पनि रातको समयमा पानीको अत्यधिक बहावका कारण उद्दारमा कठिनाइ भएको थियो । आज बिहानै सशस्त्र प्रहरी बल नम्बर २९ ज्वालामाई गणबाट सशस्त्र प्रहरी उपरीक्षक टोपबहादुर खनाल र नम्बर ४१ रिजर्ब गण चन्द्रौटा कपिलवस्तुबाट सशस्त्र प्रहरी उपरीक्षक यादव विश्वकर्माको कमान्डमा गएको विपद् व्यवस्थापनसहितको टोलीले बिहान ९ बजे चारै जनाको उद्दार गरी घर पठाएको हो ।
उनीहरूले चराउन लिएर गएका गाईबस्तु भने सोही टापुमा रहेका छन् ।