निरन्तरको बर्षाका कारण सिन्धुपाल्चोकलगायतका विभिन्न स्थानमा बाढीपहिरोले व्यापक क्षति पुर्याउन थालेपछि बुधबार बिहान विपद् व्यवस्थापन कार्यकारी समितिको सिंहदरबारमा बसेको बैठकले सबै मन्त्रालयको संयुक्त प्रयासमा विपद् प्रतिकार्यलाई प्रभावकारी बनाउने निर्णय गरेको छ ।
स्रोतका अनुसार गृहमन्त्री नेत्रित्वको उक्त समितिको बैठकले मनसुनको एक सय दिनको अवधिमा गर्ने कार्ययोजनालाई पारित गरेको छ । सो कार्ययोजनामा सबै मन्त्रालयको जिम्मेवारीका सम्बन्धमा विस्तारमा उल्लेख गरिएको बताइएको छ ।
त्यस्तै तीन महिना लगाएर मन्त्रालय, एनजीओ, आइएनजीओ, दातृ संस्थालगायतले बनाएको विपत प्रतिकार्ययोजनालाई आजको बैठकले पारित गरेको छ ।
बैठकले सिन्धुपाल्चोक, मनाङलगायत बाढी-पहिरो प्रभावित क्षेत्रमा खाद्यसामग्री, टेन्टलगायतका अन्य आवश्यक व्यवस्था तुरुन्त गर्ने र जोखिममा परेकालाई तत्काल उद्धार गर्ने निर्णय गरेको छ ।
समितिको बैठकले नुवाकोटको दुप्चेश्वरको भीरमा ठूलो ढुंगा अड्किएको र त्यसले समुदायमा क्षति पुर्याउन सक्ने भएकाले त्यसलाई व्यवस्थापन गर्ने निर्णयसमेत गरेको बताइएको छ ।
मंगलबार साँझ मेलम्ची नदीमा आएको बाढी र पहिरोमा परी कम्तीमा ७ जनाको मृत्यु हुनुका अतिरिक्त सो क्षेत्रमा व्यापक धनको क्षति भएको छ ।