सिन्धुपाल्चोक जिल्लाको मेलम्ची र हेलम्बु क्षेत्रमा मंगलबार साँझ आएको बाढीपहिरोले हालसम्म २ जनाको मृत्यु भएको छ भने ५ जना बेपत्ता छन् ।  स्रोतका अनुसार हेलम्बुमा ३ वटा र मेलम्चीमा एउटा गरी ४ वटा पक्की पुल बगेका छन् भने सडकहरू पनि भत्किएकाले यातायात सम्पर्क बिच्छेद भएको जनाइएको छ । 

त्यस क्षेत्रमा विद्युत आपूर्ति अवरुद्ध भएको र नदी किनारमा रहेका अधिकांश संरचना क्षतिग्रस्त भएका बताइएको छ । प्रहरीका अनुसार बाढीमा फँसेकाहरूलाई हेलिकप्टरबाट उद्धार गर्ने काम जारी रहेको छ । नदीमा पानीको बहाव अझै ‌नघटेको हुनाले सतर्कता अपनाउन आग्रह गरिएको छ ।

सिन्धुपाल्चोकको मेलम्ची र हेलम्बु क्षेत्रमा बाढीले क्षति पुर्‍याएको खबर सार्वजनिक भएलगत्तै विपद व्यवस्थापन कार्यकारी समितिको बैठक सिंहदरबारमा सुरू भएको थियो । स्रोतका अनुसार बैठक जारी छ ।

जारी बर्षाका कारण मनाङ, म्याग्दी, दाङलगायतका अन्य जिल्ला पनि बाढी पहिरोबाट प्रभावित भएका छन् ।