सिन्धुपाल्चोक जिल्लाको मेलम्ची नदीमा मंगलबार साँझ आएको बाढीले हाहाकार मच्चाएको छ । उक्त बाढीले ४ वटा पक्की पुल बगाएको र ७ जना बेपत्ता भएका छन् ।
बाढी र पहिरो प्रभावित क्षेत्रमा यातायात सम्पर्क बिच्छेद भएको बताइएको छ ।
त्यहाँ खानेपानी र विद्युत सेवा अवरुद्ध भएको छ । स्थानीयका अनुसार तिम्बु, चनौटे र मेलम्ची बजारमा व्यापक क्षति पुगेको छ ।
राती ठूलो बाढी र पहिरो झर्न थालेपछि किउल, ग्याल्थुम, तिपेनी, तालामाराङ, मेलम्चीलगायतका बासिन्दा घर छाडेर सुरक्षित स्थानमा बसेका छन् ।
बाढीले नदी किनारका बस्तीमा बढी क्षति पुर्याएको जनाइएको छ । मेलम्ची आयोजनामा कार्यरत चिनियाँ कम्पनीको क्याम्प र आयोजनाको सुरक्षार्थ खटिएको सशस्त्र प्रहरीको क्याम्पमा पनि क्षति पुगेको स्थानीयले बताएका छन् ।
बाढीपहिरोले मेलम्ची खानेपानी आयोजनाको ड्यामलाई पनि क्षति पुर्याएको हुन सक्ने जनाइएको छ । सशस्त्र प्रहरीको क्याम्प र प्रहरी चौकीमा पनि बाढीले क्षति पुर्याएको छ । हेलम्बुको तिम्बु बजारका कतिपय घरहरू र किउललगायत नदी किनारमा रहेका ट्राउट माछा फार्म बाढीले बगाएको छ ।
बाढीले सदरमुकाम चौतारा र हेलम्बु गाउँपालिका सबैभन्दा बढी प्रभावित भएका छन् । बाढीले ४ वटा पक्की पुल पनि बगाएको छ भने मेलम्ची बजारबाट चौतारा जोड्ने र मेलम्ची बजारबाट दुवाचौर जोड्ने पुल पनि बगाएको छ । हेलम्बुको चनौटेमा रहेको पुल र हालसालै निर्माण सम्पन्न भएको नाकोटेको पुल पनि बगाएको र ठाउँठाउँमा झोलुङ्गे पुल पनि बगाएको स्थानीयले बताएका छन् ।
अहिले पहिरो झर्ने क्रम जारी रहेकाले उद्धारमा कठिनाइ भइरहेको प्रहरीले जनाएको छ । उद्धारका लागि नेपाली सेना, सशस्त्र प्रहरी र नेपाल प्रहरीको टोली परिचालन भएको बताइएको छ ।
जल तथा मौसम विज्ञान विभागले सिन्धुपाल्चोकको जलबिरेस्थित बलेफी खोला जलमापन केन्द्रमा अकस्मात जल सतह बढेर खतराको तह पार गरेकाले तटीय क्षेत्रहरूमा अर्को सूचना जारी नभएसम्मका लागि उच्च सतर्कता अपनाउन आग्रह गरेको छ ।
