लुम्बिनी प्रदेशमा राष्ट्रियसभामा रिक्त पदका लागि आज उपनिर्वाचन हुँदै
नेकपा (माओवादी केन्द्र)बाट विजयी अर्घखाँचीका चन्द्रबहादुर खड्का नेकपा (एमाले)मा प्रवेश गरेपछि पार्टीले कारबाही गर्दा रिक्त भएको राष्ट्रियसभाको एक पदका लागि आज मतदान हुँदै छ ।
बिहान ९ बजेदेखि दिउँसो ३ बजेसम्म प्रदेश राजधानी दाङको कर्मचारी मिलन केन्द्रमा मतदान गर्ने व्यवस्था गरिएको छ । स्रोतका अनुसार निर्वाचन सकिएलगत्तै मतगणना सुरु हुने र आजै परिणाम सार्वजनिक गर्ने तयारी भइरहेको छ ।
नेपाली कांग्रेस, माओवादी केन्द्र, जनता समाजवादी पार्टी (जसपा) र राष्ट्रिय जनमोर्चाका तर्फबाट संयुक्त उम्मेदवार दृगनारायण पाण्डेय र एमालेका तर्फबाट चन्द्रबहादुर खड्का गरी जम्मा २ जना चुनावी प्रतिस्पर्धामा उत्रिएका छन् ।
उक्त उपनिर्वाचनमा लुम्बिनी प्रदेशसभा सदस्य ८३ जना तथा लुम्बिनी प्रदेशअन्तर्गतका पालिका प्रमुख र उपप्रमुखहरू गरी २१७ गरी जम्मा ३०० जना मतदाता रहेका छन् ।
लुम्बिनी प्रदेशमा जनता समाजवादी पार्टी नेपालले कारबाही गरेका तर पछि सर्वोच्च अदालतको आदेशबाट पुनर्बहाली भएका कल्पना पाण्डेय, सन्तोषकुमार पाण्डेय, सुमन शर्मा रायमाझी र विजयबहादुर यादवलाई पनि निर्वाचन आयोगले पूरक मतदाताको रूपमा मताधिकार दिएको छ ।