सरकारले यस वर्षदेखि ज्येष्ठ नागरिकको मासिक भत्ता बढाएर ५ हजार रुपैयाँ पुर्‍याउने भनेर सरकारकै केही मन्त्रीले र सत्तारुढ दलका नेताले भनिरहे पनि यो भत्ता मासिक ४ हजार रुपैयाँ मात्र पुर्‍याएको छ । 

शनिबार आर्थिक वर्ष २०७८/०७९ को बजेट सार्वजनिक गर्दै अर्थमन्त्री विष्णु पौडेलले ज्येष्ठ नागरिकको मासिक भत्ता १ हजार रुपैयाँ बढाएर ४ हजार रुपैयाँ बनाएका हुन् ।

उनका अनुसार सबै प्रकारका सामाजिक सुरक्षा भत्ता ३३ प्रतिशत वृद्धि गरिएको छ । सामाजिक सुरक्षाका लागि १ खर्ब रुपैयाँ विनियोजन गरिएको अर्थमन्त्री पौडेलले बताए ।

बढेको भत्ता १ साउनबाट कार्यान्वयनमा आउनेछ ।

२०७४ को आम चुनाव अगाडि नै वाम गठबन्धनले पनि यो भत्ता ५ हजार रुपैयाँ पुर्‍याउने उल्लेख गरेको थियो भने नेपाली कांग्रेस नेतृत्वको सरकारले बृद्धभत्ता पाउने उमेर ७० बाट घटाएर ६५ मा झार्ने प्रस्ताव गरेको थियो तर उमेर घटाउने निर्णय कार्यान्वयनमा आएन ।