काठमाडौं उपत्यकाका तीनवटै जिल्लाका प्रमुख जिल्ला अधिकारीको बैठकले निषेधाज्ञा १५ दिन थप गरी १३ जेठ सम्म पुर्याउने निर्णय गरेको छ ।

स्रोतअनुसार उक्त बैठकले पार्टी प्यालेसमा गरिने  विवाह, ब्रतबन्ध र भोजजस्ता कार्यक्रम पनि रोक लगाउने र त्यस्ता कार्यक्रम घरैमा गर्दा पनि १० जना भन्दा सहभागी हुन नपाइने निर्णयसमेत गरेको छ ।

त्यस्तै प्राथमिकताप्राप्त विकास आयोजनाबाहेकका सबै निर्माण कार्यहरूमा रोक लगाउने निर्णय गरिएको बताइएको छ ।

उपत्यकामा पहिलो पटक वैशाख १६ गतेदेखि २२ गतेसम्म निषेधाज्ञाको आदेश जारी गरिएकोमा कोरोना महामारी मत्थर नभएपछि एक हप्ता थप गरेर वैशाख २९ गतेसम्म पुर्‍याइएको थियो । पछिल्लो एक हप्तामा हालसम्मकै उच्च संक्रमित एवं मृत्युदर देखिएपछि निषेधाज्ञा सकिनु भन्दा एक दिनअघि उपत्यकाका प्रजिअहरुको बैठकले १५ दिन थप गरेको हो । 

निषेधाज्ञामा औषधि पसल दिनभर तथा अत्यावश्यक खाद्यवस्तु र तरकारीका पसल विहान १० बजेसम्म खोल्न पाइने व्यवस्था गरिएको छ । त्यस्तै निषेधाज्ञा अवधिभर अत्यावश्यक सेवाबाहेकका गाडी पनि चलाउन रोक लगाइएको छ ।