वैशाख १६ गतेदेखि उपत्यकामा निषेधाज्ञा, यातायात पनि बन्द

कोरोना संक्रमण बढ्दो रूपमा फैलिँदै गएपछि काठमाडौँ उपत्यकाका ३ जिल्लामा निषेधाज्ञा लाग्ने भएको छ ।

१६ वैशाख राती १२ बजेदेखि काठमाडौँ, भक्तपुर र ललितपुर जिल्लामा खाद्य पदार्थ र औषधि पसलबाहेकका पसल बन्द गर्ने र निजी र सार्वजनिक यातायात पनि बन्द गर्ने गरी निषेधाज्ञा जारी गर्ने तयारी भएको बताइएको छ । हवाई यातायात भने बन्द नहुने स्रोतको भनाइ छ ।

आइतबार कोभिड- १९ संकट व्यवस्थापन केन्द्र (सीसीएमसी)को बैठकले १६ वैशाखदेखि उपत्यकामा निषेधाज्ञा गर्न सुझाव दिएको थियो । सोमबार उपत्यकाका ३ वटा जिल्लाका प्रमुख जिल्ला अधिकारीको बैठकले १६ वैशाखदेखि निषेधाज्ञाको आदेश जारी गर्ने निर्णय गरेको जनाइएको छ । आगामी कदमबारे निर्णय गर्न आजै मन्त्रिपरिषद् बैठक पनि बस्दै छ ।