आज चैत्र शुक्ल नवमी । आज मर्यादा पुरुषोत्तम रामको सम्झनामा ‘रामनवमी’ पर्व देशभरि श्रद्धा र भक्तिपूर्वक पूजा आराधना गरी मनाइँदै छ ।
असत्यमाथि सत्यको विजय भएको दिनका रूपमा मनाइने रामनवमीका अवसरमा देशभरका राम मन्दिरहरूमा पूजापाठ गरिन्छ । जनकपुरमा रहेको राम-जानकीको मन्दिरमा आज नेपाल तथा भारतका भक्तजनको घुइँचो लाग्ने गर्छ ।
त्रेतायुगमा आजकै दिन अयोध्यामा राजा दशरथ र रानी कौशल्यावतीका जेठो छोराका रूपमा विष्णुको अवतार लिएर श्रीरामको जन्म भएको शास्त्रमा उल्लेख छ । रामले मिथिलाका राजा जनककी छोरी सीतासँग विवाह गरेको र दुष्टहरूको संहार गरेको वाल्मिकीय रामायणमा उल्लेख छ ।
रामनवमीका दिन श्रीरामको व्रत, उपवास गरी पूजा, आराधना गर्नाले लोकमा सुख, शान्ति र परलोकमा सद्गति पाइने धार्मिक विश्वास छ ।
यस वर्ष पनि कोरोना संक्रमणको जोखिम भएकाले मन्दिरहरूमा स्वास्थ्य सुरक्षाका मापदण्ड पालना गर्न सरकारले सबैलाई आग्रह गरेको छ ।
यसैबीच चितवनको माडीस्थित अयोध्यापुरीमा राम-सीताको मूर्ति आज प्रतिस्थापन गरिँदै छ । प्रतिस्थापन गरिने मूर्तिहरू मंगलबार नै प्रधानमन्त्री निवास बालुवाटारबाट रथयात्रासहित चितवन लगिएको छ ।
संस्कृति, पर्यटन तथा नागरिक उडड्यनमन्त्री भानुभक्त ढकालको नेतृत्वको रथयात्रा समूह देवघाटमा बास बसेको थियो ।
बुधबार बिहान गण्डकीमा स्नानसहित पूजा गरी चितवनको माडीस्थित अयोध्यापुरीतर्फ रथयात्रा अघि बढ्नेछ ।