नापी विभागले घरजग्गाको नक्सा हेर्न र प्रिन्ट गर्न सहज बनाएको छ । इन्टरनेटबाटै घरजग्गाको नक्सा हेर्न र आफैँ प्रिन्ट गर्न मिल्ने बनाएको हो । 

यो व्यवस्था कार्यान्वयनमा आएपछि आफ्नो घरजग्गाको नक्सा प्रिन्ट गर्न र त्यसबापतको शुल्क बुझाउन कार्यालय धाइरहनु नपर्ने भएको छ । मेरोकित्ताडटजीओभीडटएनपी लगइन गरेर यो सेवा लिन सकिने विभागले जनाएको छ ।

नापी विभागमा आज आयोजना हुने औपचारिक समारोहबाट प्रधानमन्त्री केपी शर्मा ओलीले यस व्यवस्थाको शुभारम्भ गर्नेछन् ।

विभागका अनुसार बिहीबार यो सेवा काठमाडौँ उपत्यकाका डिल्लीबजार, कलंकी र भक्तपुरको कार्यालयमा लागू हुनेछ । त्यसपछि क्रमशः देशभर कार्यान्वयनमा ल्याइने विभागले जनाएको छ ।

एक साताभित्र काठमाडौँ उपत्यकाभर र त्यसपछि क्रमशः देशैभरका १२६ वटा नापी कार्यालयबाट मेरो कित्ता सेवा सुरु हुने विभागको भनाइ छ ।