नेपाल पत्रकार महासंघको नयाँ नेतृत्व चयनका लागि बुधबार बिहान ९ बजेदेखि मतदान भइरहेको छ । यसपालि पहिलो पटक महासंघको नेतृत्व प्रत्यक्ष निर्वाचन प्रणालीमार्फत चयन हुँदै छ । यसअघि महासंघको नेतृत्व चयनका लागि पार्षद्हरूले मात्र मत दिन पाउने व्यवस्था थियो ।
देशभरका १३ हजार १८० जना पत्रकारहरू सहभागी रहेको यस निर्वाचनमा केन्द्रीय समितिका ४९ पदका लागि १५२ जनाको उम्मेदवारी परेको छ । यस निर्वाचनमा अध्यक्ष पदका लागि केन्द्रमा विपुल पोखरेल, निर्मला शर्मा र गजेन्द्रसिंह बुढाथोकी चुनावी मैदानमा उत्रिएका छन् । पोखरेल नेपाल प्रेस युनियनलगायत प्रेस सेन्टर र प्रेस चौतारी (नेपाल-खनाल) खेमासमेतका विभिन्न ११ वटा संगठनका तर्फबाट साझा उमेदवार भएका हुन् भने शर्मा प्रेस चौतारी (ओली खेमा)का तर्फबाट र बुढाथोकी स्वतन्त्र उम्मेदवार रहेका छन् ।
पोखरेल प्यानलबाट वरिष्ठ उपाध्यक्षमा रमेश विष्ट, समावेशी उपाध्यक्षमा उदय जीएम र महिला उपाध्यक्षमा बाला अधिकारी उम्मेदवार छन् भने महासचिवका उम्मेदवार रोशन पुरी छन् । सचिव पदमा गोविन्द चौलागाईं (खुला), पवन आचार्य (एसोसिएट), सिर्जना अर्याल (महिला), नारायण किलम्बु (आदिवासी जनजाति), दीपेन्द्र चौहान (मधेसी), हेमकर्ण विक (दलित)ले पोखरेल प्यानलबाट उम्मेदवारी दिएका छन् । त्यस्तै, कलेन्द्र सेजुवाल कोषाध्यक्ष र लेखनाथ न्यौपाने लेखा संयोजकका उम्मेदवारका रूपमा चुनावी मैदानमा उत्रिएका छन् ।
उता, शर्मा नेतृत्वको प्यानलबाट वरिष्ठ उपाध्यक्षमा माधव नेपाल, समावेशी उपाध्यक्षमा अवधेश झा तथा महिला उपाध्यक्षमा दाना केसी सुवेदी उम्मेदवार छन् भने बालकृष्ण बस्नेत उक्त प्यानलबाट महासचिवको उम्मेदवार छन् । त्यसरी नै सचिव पदमा रामकृष्ण ज्ञवाली (खुला), निमा काफ्ले (महिला), शाहीमान राई (आदिवासी जनजाति), स्वेता सिन्हा (मधेसी), मधु शाही (दलित) र रामेश्वर कार्की (एसोसिएट) उम्मेदवार बनेका छन् । यस प्यानलमा कृृृष्ण गिरी र द्वारिकाप्रसाद काफ्ले क्रमश: कोषाध्यक्ष र लेखा समितिको संयोजक पदको प्रतिस्पर्धामा छन् ।
महासंघको निर्वाचनका लागि ७७ जिल्लाका सम्बन्धित जिल्ला शाखामा, ४२ प्रतिष्ठानका विभिन्न १९ स्थानमा र एक एसोसिएटको दशरथ रंंगशालामा गरी कुल ९७ बुथमा निर्वाचन तोकिएको छ । केही शाखा र प्रतिष्ठानमा सर्वसम्मत रूपमा नयाँ नेतृत्व चयन भए पनि आज २५ चैतमा मात्र निर्विरोध निर्वाचित भएको घोषणा गरिनेछ ।
महासंघका जिल्ला शाखा ७७, प्रतिष्ठान शाखा ४२, एसोसिएट सदस्य ११, वैदेशिक शाखा ९, प्रदेश परिषद् १०, प्रदेश समिति १०, केन्द्रीय परिषद् र केन्द्रीय समिति रहेका छन् । महासंंघको केन्द्रीय समिति ४९ सदस्यीय रहेको छ भने प्रदेश समिति २१ सदस्यीय रहने विधानको प्रावधान छ । जिल्ला तथा प्रतिष्ठान शाखा भने सदस्य सङ्ख्याअनुसार रहने व्यवस्था छ ।
आआफ्नो प्रदेशबाटै केन्द्रीय नेतृत्वलाई मत दिन मिल्ने व्यवस्था गरिएको यस पटकको निर्वाचनमा काठमाडौँ उपत्यकामा प्रतिष्ठान सदस्यका लागि १९ वटा मतदान केन्द्र तोकिएको छ भने एसोसिएट सदस्यका लागि दशरथ रंगशालामा मतदान गर्ने व्यवस्था गरिएको छ ।
मतदान सम्पन्न भएपश्चात बुधबार नै मतगणना सुरु गरिनेछ । सबै कुरा स्वाभाविक रहे २६ चैतमा नै सबै तहको मत परिणाम आउने आँकलन गरिएको छ ।
