प्रधानमन्त्री निवास बालुवाटारमा ७ चैतमा बसेकाे नेकपा (एमाले)को केन्द्रीय कमिटीको बैठकले वरिष्ठ नेता माधवकुमार नेपाल, उपाध्यक्ष भीम रावल, उपमहासचिव घनश्याम भुसाल र स्थायी कमिटी सदस्य सुरेन्द्र पाण्डेसँग स्पष्टीकरण सोध्ने निर्णय गरेको थियो । सोही निर्णयबमोजिम गत आइतबार एमाले महासचिव ईश्वर पोखरेलले उनीहरूलाई छुट्टाछुट्टै पत्र लेखेर स्पष्टीकरण माग गरेका थिए ।
स्पष्टीकरण माग गरेको पत्र पाएपछि मंगलबार नेपाल खेमाका स्थायी कमिटीका केही नेताहरू दिनभर छलफलमा सक्रिय भएका थिए । उक्त छलफलबाट स्पष्टीकरण सोधिएका नेपाल खेमाका चारै जना नेताले पत्रको जबाफ छुट्टाछुट्टै बुझाउने तयारी गरेको बताइएको थियो ।
त्यसैअनुसार बिहीबार वरिष्ठ नेता नेपालले पार्टी अध्यक्ष केपी शर्मा ओलीमाथि नै प्रश्न गर्दै उक्त स्पष्टीकरणको जबाफ दिएका छन् । उनले आफूले नभई पार्टी अध्यक्ष ओली स्वयंले विधान उल्लंघन गरेको र उनीमाथि नै कारबाही गर्नुपर्ने जिकिर गरेका छन् । अध्यक्ष ओलीलाई सम्बोधन गरेको नेपालले लेखेको जबाफमा अध्यक्ष ओलीले गरेका गतिविधिहरू नेकपा (एमाले)को नवौँ राष्ट्रिय महाधिवेशनबाट पारित विधानको सातौँ अध्यायका विभिन्न धारामा स्थापित मान्यताका विपरीत हुनुका साथै धारा ४९ को १, २, ३, ४, ५, ६, ७, ९ र १४ आकर्षित हुने भई कारबाही गरिनुपर्ने प्रकृतिको देखिएको उल्लेख गरेका छन् ।
'संगठन संचालनको आधारलाई स्वेच्छाचारी ढंगले भत्काउने भत्काउने आधार तपाईंले कहाँबाट पाउनुभयो ?' भन्दै 'यस्तो स्वेच्छाचारी काम गर्दा तपाईंलाई नवौँ महाधिवेशनमा लिएको शपथको किन सम्झना भएन ?' भनी अध्यक्ष ओलीलाई प्रश्न गरेका छन् । ८ पृष्ठ लामो उक्त जवाफमा नेता नेपालले ओलीले पार्टी र देशको गोप्यता भंग गरेको, राष्ट्रिय हित, अस्मिता र स्वाभिमानमा आघात पुर्याएको लगायत आरोप लगाउँदै स्पष्टीकरण आफूले नभएर अध्यक्ष ओलीले दिनुपर्ने स्पष्ट रहेको दाबी गरेका छन् । १३ बुँदामा समेटिएको उक्त जबाफमा नेता नेपालले ओलीमाथि तिक्ततापूर्ण आक्रोशलाई शालीन र भद्र ढंगले खन्याएका छन् ।
शुक्रबार नेपाल समूहले उपलब्ध केन्द्रीय सदस्यहरूको बैठक डाकेको छ ।
हेर्नुहोस् जबाफ: