एक महिनाअघि बेपत्ता दम्पत्तीको कङ्काल भेटियो
महोत्तरी जिल्लाको पिपरा गाउँपालिका- ५ का ६५ वर्षीय मुसाफिर झा र ५८ वर्षीया गीतादेवी झा दम्पत्तीको आज अपराह्न कङ्काल फेला परेको छ । उनीहरू गत १० फागुन राती घरमा सुतिरहेको अवस्थामा ओछ्यानसहित बेपत्ता भएका थिए ।
प्रहरीका अनुसार दुईवटा छुट्टाछुट्टै प्लाष्टिकका बोरामा शरीरको सबै मासु गलिसकेको र कङ्काल मात्रै बाँकी रहेको अवस्थामा झा दम्पत्तीका शवहरू फेला परेका थिए । बुुुुबालाई उनले लगाएको कपडा र आमालाई उनले लगाएकी चुरा र पोतेको आधारमा निजका छोरा मनीषकुमार झाले दुवै कङ्काल झा दम्पत्तीकै भएको पहिचान गरेको प्रहरीले जनाएको छ ।
बिहीबार दिउँसो पिपरा- २ स्थित पिपरा-धिरापुर सडकखण्डमा गत वर्षको बाढीले २० फिट गहिरो हुने गरी माटो बगाई बनाएको खाल्डो पुर्ने क्रममा स्काभेटरले भर्खरै पुरिएको माटो मिलाउन खोज्दा सोही स्काभेटरको बकेटमा कङ्काल रहेको बोरा आएपछि झा दम्पत्तीको शव भेटिएको थियो ।
घटनास्थलमा प्रदेश २ को प्रहरी, जिल्ला प्रहरी कार्यालय र इलाका प्रहरी कार्यालय सहोडवाका टोली पुगी दुवै कङ्कालको उत्खनन गरी आवश्यक जाँचका लागि विधि विज्ञान प्रयोगशालामा पठाइएको जनाइएको छ ।
झा दम्पत्तीका बारेमा प्रहरीले जिल्लाको ४२ पोखरीमा खोजतलास गरिसकेको थियो भने ४ दर्जनभन्दा बढी व्यक्तिलाई सोधपुछ पनि गरिसकेको थियो । त्यही घटनामा संलग्न रहेको आरोपमा प्रहरीले ४ जनालाई सार्वजनिकसमेत गरिसकेको छ ।