युरोपका विभिन्न देश र छिकेकी देश भारतमा समेत दोस्रो चरणको कोरोना संक्रमणको जोखिम बढेपछि नेपालमा पनि त्रास बढेको छ । यससँगै नेपालले पुनः लकडाउन गर्ने अनुमान गरिइरहेका बेला अर्थमन्त्री विष्णु पौडेलले भने कोरोना संक्रमण रोकथामका लागि लकडाउन नहुने बताएका छन् । 

आशंकाबाट होइन, यथार्थबाट निर्देशित भएर अगाडि बढ्नुपर्ने उनको भनाइ छ । कोरोनाको दोस्रो लहरको चर्चा चलिरहेका बेला त्यसबाट हामीले जोगिनुपर्ने र आर्थिक सामाजिक क्रियाकलापलाई नियमित र सुचारु पनि गर्नुपर्ने उनले बताए ।

स्वास्थ्य मापदण्डलाई ध्यानमा राखेर सरकार नियमित रूपले अगाडि बढ्ने मन्त्री पौडेलले बताएका छन् । अहिले सरकारले सीमानाका बन्द गर्ने, बन्दाबन्दी (लकडाउन) गर्नेतर्फ सोचेको छैन र त्यो अहिले उपयुक्त पनि नहुने उनको भनाइ छ ।