चितवनको भरतपुरस्थित चितवन मेडिकल कलेज (सीएमसी) शिक्षण अस्पतालले पहिलो पटक कलेजो प्रत्यारोपण गरेको छ । राजधानीबाहिर कलेजो प्रत्यारोपण गर्ने सीएमसी पहिलो भएको अस्पतालको दाबी छ ।

उक्त शिक्षण अस्पतालले यही ८ चैत आइतबार ५४ वर्षीया धनकुमारी लामाको कलेजो प्रत्यारोपण गरेको थियो । धनकुमारीलाई उनकै ३३ वर्षीया छोरी उषाले कलेजो दिएकी थिइन् ।

पहिला भरतपुरकै निवासी भए पनि धनकुमारीको परिवार लामो समयदेखि काठमाडौँमा बस्दै आएको थियो । ५ महिनाअघि स्वास्थ्यमा समस्या देखिएपछि अस्पताल लैजाँदा कलेजो नराम्रो गरी बिग्रिएको पाइएको थियो ।

कलेजो प्रत्यारोपणपछि आमा-छोरी दुवैको अवस्था सामान्य हुँदै गएको जनाइएको छ । नेपालमा ५ वर्षअघि कलेजो प्रत्यरोपणको सेवा सुरुवात भएको हो । हाल उपत्यकाका त्रिवि शिक्षण अस्पताल महाराजगन्ज र भक्तपुरको मानव अंग प्रत्यारोपण केन्द्रपछि कलेजो प्रत्यारोपण गर्ने तेस्रो अस्पताल चितवन मेडिकल कलेज भएको बताइएको छ ।

नेपालमा भएको यो आठौँँ प्रत्यारोपण भएको र कलेजो प्रत्यारोपणको खर्च २५ लाख रुपैयाँ लाग्ने अस्पताल स्रोतले जनाएको छ । चिकित्सकहरूका अनुसार दिने व्यक्तिको कलेजोको निश्चित भाग काटेर आवश्यक पर्ने व्यक्तिको शरीरमा राख्ने र कलेजो आफैँ विकसित हुने अंग भएकाले दिने र लिने दुवैको कलेजो बिस्तारै विकसित हुँदै गएर केेेेही समयमै दुवै जना तन्दुरुस्त हुन्छन् ।