बैतडीकी भागरथी भट्टको बलात्कारपछि भएको हत्या प्रकरणमा पक्राउ गरिएका अभियुक्तको डीएनए रिपोर्ट मृतक भागरथीको भजाइनल स्वाबबाट निकालिएको डीएनए रिपोर्टसँग मिलेको प्रहरीले बताएको छ ।

राष्ट्रिय विधि विज्ञान प्रयोगशालामा गरिएको परीक्षणको रिपोर्ट बिहीबार आएको प्रहरीले जनाएको छ ।

गत २१ माघमा विद्यालय गएकी भागरथीको बलात्कारपछि हत्या भएको हुन सक्ने भन्दै प्रहरीले अनुसन्धान कार्य अघि बढाएको थियो । अब अभियुक्त र मृतकको डीएनए रिपोर्ट मेल खाएपछि अनुसन्धान प्रक्रिया सहज ढंगले अगाडि बढ्ने बताइएको छ ।

बलात्कार र हत्याको आरोपमा पक्राउ गरिएका मृतककै गाउँले अभियुक्त दिनेश भट्टलाई जिल्ला अदालत बैतडीको आदेशले पुर्पक्षका लागि बालसुधार गृह डोटीमा राखिएको छ ।