भारतमा गत २४ घण्टामा ५३ हजार ४७६ जना थप व्यक्तिमा कोरोना संक्रमण देखिएपछि कुल संक्रमितको सङ्ख्या १ करोड १७ लाख ८७ हजार ५३४ पुगेको त्यहाँको स्वास्थ्य मन्त्रालयले जानकारी दिएको छ । 

त्यसैगरी विगत २४ घण्टामा कोरोना सङ्क्रमणबाट २५१ जनाको मृत्यु भएपछि त्यहाँ कोरोनाका कारण कुल मृतकको सङ्ख्या १ लाख ६० हजार ६९२ पुगेको जनाइएको छ ।

सोही अवधिमा यहाँ कुल सङ्क्रमितमध्ये ३ लाख ९५ हजार १९२ जना अहिले पनि सङ्क्रमित अवस्थामै रहेका छन् भने १ करोड १२ लाख ३१ हजार ६५० जना सङ्क्रमणमुक्त भएका छन् । 

भारतमा जनवरीबाट कोरोना भाइरसविरुद्धको खोप अभियान शुरु भएको थियो । सो समयदेखि हालसम्म ५ करोड ३० लाखभन्दा बढीले खोप लगाइसकेका छन् । त्यहाँ कोरोना परीक्षण गर्ने कार्य पनि निरन्तर जारी रहेको र बुधबार एकै दिनमा १० लाख ६५ हजारभन्दा बढीको कोरोना परीक्षण गरिएको जनाइएको छ ।