भारत सरकारले अकस्मात् कोभिशील्ड खोपको निकासीमा रोक लगाएको छ ।
प्रतिडोज चार डलरमा किनिएको उक्त खोपको २० लाख डोजमध्ये आधा पठाइसकेको कम्पनीले नेपाल सरकारलाई कोभिशील्ड खोपको बाँकी १० लाख डोज पठाउन बाँकी छ ।
हालसम्म नेपालले भारत सरकारबाट अनुदानमा पाएको १० लाख डोज खोप, कोभ्याक्स सुविधाअन्तर्गत पाएको झन्डै साढे तीन लाख डोज र आफैँ खरिद गरेकोमध्ये प्राप्त १० लाख डोज मात्र पाएको छ ।
अहिले आधा दर्जनभन्दा धेरै किसिमका खोपहरू बजारमा आइसकेका भए तापनि कतिपय खोप धेरै चिसो तापक्रममा भण्डारण गर्नुपर्ने हुँदा नेपालका लागि अनुपयुक्त देखिएको छ भने कतिपय खोपको मूल्य धेरै बढी छ । कोभ्याक्सीनको प्रतिडोज १६ डलर तथा सिनोफार्म खोपको प्रतिडोज ३० डलर पर्ने भएकोले सरकारलाई ती खोपको मूल्य तिर्न कठिन परेको बताइएको छ ।
उता चीन सरकारले अनुदानमा दिने भनेको सिनोफार्मको ८ लाख डोज खोप भने अर्को साता ल्याउने चाँजोपाँजो मिलाइँदै गरेको जनाइएको छ ।
भारतको विदेश मन्त्रालय स्रोतलाई उदृत गर्दै बीबीसीले बताएअनुसार अक्सफोर्ड-आस्ट्राजेनेका खोपको सबै निर्यातहरूमाथि उसले अस्थायी रोक लगाएको छ।
केही समय देखि भारतभित्रै कोभिड बिरामीको सङ्ख्या तिब्ररूपमा बढ्न थालेको र त्यहाँ अप्रिल १ तारिखदेखि ४५ वर्षभन्दा माथिका मानिसला खोप लगाइने भएकाले आन्तरिक माग धान्नकै लागि धेरै खोप भारतमै आवश्यक पर्ने बताइएको छ ।
नेपालमा पनि कोभिड-१९ ले पुन: टाउको उठाउन थालेका बेला भारतको यो अप्रत्याशित कदमले निकै अप्ठेरो पार्न सक्ने विज्ञहरू बताउँछन् ।
