कोरोनालाई हेप्नु घातक हुनसक्ने: भारतमा गत २४ घन्टामा २७५ को मृत्यु
कोभोड-१९ महामारीलाई नेपालमा आमरूपमा नजरअन्दाज गर्न थालिएको भए तापनि यसको प्रभाव घटिसकेको भन्ने सोच राख्नु भ्रम मात्र भएको विभिन्न तथ्यांकबाट स्पष्ट देखिएको छ ।
छिमेकी मुलुकभारतमा गत २४ घण्टामा कोरोना संक्रमणका कारण २७५ जनाको मृत्यु भएपछि यहाँ कूल मृतकको सङ्ख्या एक लाख ६० हजार ४४१ पुगेको केन्द्रीय स्वास्थ्य तथा परिवार कल्याण मन्त्रालयले मंगलबार दिएको जानकारीमा उल्लेख छ । गत २४ घन्टामै त्यहाँ ४७ हजार २६२ जना थप व्यक्तिमा कोरोना संक्रमण देखिएपछि कूल संक्रमितको सङ्ख्या एक करोड १७ लाख ३४ हजार ५८ पुगेको मन्त्रालयले जानकारी दिएको छ ।
कूल संक्रमितमध्ये तीन लाख ६८ हजार ४५७ जना अहिले पनि संक्रमित अवस्थामै रहेका छन् भने कूल एक करोड १२ लाख ५ हजार १६० जना संक्रमणमुक्त भएका छन् ।
भारतमा जनवरीबाट कोरोना भाइरसविरुद्धको खोप अभियान शुरु भएको थियो । सो समयदेखि हालसम्म पाँच करोड भन्दा बढीले खोप लगाइसकेका छन् ।
त्यसैगरी कोरोना परीक्षण गर्ने क्रम पनि चलिरहेको जनाइएको छ । सोमबारसम्म भारतमा २३ करोड ६४ लाख ३८ हजार भन्दा बढी व्यक्तिको कोरोना परीक्षण गरिएको बताइएको छ । भारतमा मंगलबार एकै दिनमा १० लाख २५ हजार भन्दा बढीको कोरोना परीक्षण गरिएको समाचारमा जनाइएको छ ।
संक्रमण तिब्ररूपमा फैलिन थालेपछि कोभिडको दोस्रो लहर शुरू भएको भन्दै युरोपका विभिन्न मुलुकहरूले पुनः लकडाउन गरिसकेका छन् ।