दैलेखको नारायण नगरपालिका- ५ स्थित नवदुर्गा निमावि धिताहमा सयौंँ विद्यार्थी बिरामले थला परेका छन् । बालविकासदेखि कक्षा ८ सम्मका विद्यार्थी बिरामी परेपछि  ३ दिनका लागि विद्यालय बन्द गरिएको छ । 

ज्वरो आउने, रिँगटा लाग्ने र थरथरी काप्नेजस्ता बिरामले विद्यार्थी थला परेपछि मंंगलबारदेखि ३ दिनका लागि विद्यालय बन्द गरिएको जनाइएको छ । 

आइतबार करिब १५०, सोमबार करिब १०० र मंंगलबार ८५ विद्यार्थी बिरामी परेपछि बाध्य भएर चिकित्सक र व्यवस्थापन समितिको सल्लाहमा ३ दिनका लागि विद्यालय बन्द गरिएको बताइएको छ । 

यो अन्य कुनै महामारी नभई भाइरल ज्वरो भएको जनाइएको छ । हाल सबै बिरामीलाई औषधि दिइएको र सबैलाई आराम गर्न चिकित्सकले सुझाव दिएका छन् । धेरै विद्यार्थी  बिरामी भएको खबर पाएपछि जिल्ला अस्पताल दैलेखबाट डा. विवेक गुरुङसहितको टोली त्यहाँ पुगेको बताइएको छ ।

विद्यार्थीहरू बाहेक नारायण नगरपालिका- ५ छातीकोटका धेरैजसो घरका मानिसहरू पनि बिरामी परेको जनाइएको छ । टोलमा धेरै बिरामी परेको खबर पाएपछि अहिले स्थानीय स्वास्थ्यचौकीमा बिरामीको भीड लाग्ने गरेको छ ।