नेकपा एमालेमा असन्तुष्ट माधव नेपाल    खेमाले एकपछि अर्को समानान्तर कमिटी बनाइरहेको छ । महिला संगठन र युवा संघपछि अहिले विद्यार्थीको अलग्गै नेतृत्व चयन गरेको छ ।

काठमाडौंमा आयोजित नेपाल खेमाको अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)को राष्ट्रिय भेलाले मंगलबार ५०१ सदस्यीय केन्द्रीय कमिटी बनाएको हो ।

माधव खेमाको अखिलमा सुदेश पराजुली अध्यक्ष चयन भएका छन् भने सहअध्यक्षमा ओसिम आलम र महासचिवमा आरती लामा छन् । उनीहरू तीनै जना अनेरास्ववियुका सचिव थिए ।

उपाध्यक्षमा यशु लामा, रेनु शाही, माधव पन्त, कल्पना थापा, सुदीप शर्मा, लोकेश निरौला र केशरी रेग्मी छन् भने कोषाध्यक्षमा दिपेश प्रसाईंलाई चयन गरिएको छ । सातवटै प्रदेशको नेतृत्व पनि बनाइएको छ भने १३ जनाको स्थायी कमिटी गठन गरिएको छ ।

यसैबीच पार्टी अध्यक्ष केपी ओली खेमाका अनेरास्ववियुका अध्यक्ष ऐन महरले संगठनको नाममा भेला गर्नेहरूमाथि अनुशासनको कारबाही गर्ने चेतावनी वक्तव्यमार्फत दिएका छन् ।