नयाँ सत्ता समीकरणका लागि छट्पटाएको नेकपा एमाले अध्यक्ष केपी ओली खेमा 'निर्णायक' मानिएको जनता समाजवादी पार्टीलाई फकाएर सत्ता टिकाउने दाउमा छ । पटकपटक जसपा अध्यक्ष महन्थ ठाकुरसँग विभिन्न चरणमा वार्ता भइरहेको छ ओलीको तर सहमतिमा पुगेको छैन ।
२ दिनअघि वार्ता सहमतिको नजिक पुगेको बताइए पनि जसपाले आफ्ना रेशम चौधरीलगायत बन्दी रहेका नेता/कार्यकर्ता रिहाइको शर्तलाई अडानका रूपमा राखेपछि वार्ता मिल्न नसकेको स्रोत बताउँछ ।
हिजो १० चैतमा पनि जसपा अध्यक्ष ठाकुर र वरिष्ठ नेता राजेन्द्र महतोले बालुवाटारमै पुगेर ओलीलाई भेटे । उक्त भेटमा दुवै तर्फका कार्यदल सदस्यहरूले अहिलेसम्म भएको गृहकार्यबारे ब्रिफिङ गरे ।
मुद्दा फिर्ताको विषयमा पुगेर वार्ता अड्किएको एक सहभागी बताउँछन् । मुद्दा फिर्ता झट्ट नहुने, लामो प्रक्रियागत कार्य भएको हुँदा यो काम तत्काल हुन नसक्ने र बिस्तारै हुने ओलीले आश्वासन दिए पनि जसपाका नेताहरूले मुद्दा मामिलाको विषय नटुंगिएसम्म सत्ता गठनबन्धनमा नजाने बताइरहेका छन् ।
प्रधानमन्त्री ओली भने पहिला आफ्नो सत्ताको आयु लम्ब्याउने, बाँकी 'देखा जाला' भन्ने सोचमा देखिएका छन् । यही भएर जसपाकै अन्य जिम्मेवार नेताहरू डा. बाबुराम भट्टराई र उपेन्द्र यादवलाई मतलब नै नगरी ठाकुर-महतोसँग नजिक बनिरहेका छन् ।
उसो त भट्टराई-यादवलाई जानकारी नै नदिई ठाकुर-महतोले ओलीसँग सत्ता गठबन्धनको पहल गरिरहेको स्रोत बताउँछ । यसमा भट्टराई-यादव ठाकुरप्रति असन्तुष्ट देखिएका छन् ।
जसपाका संघीय परिषद् अध्यक्ष डा. बाबुराम भट्टराई, अध्यक्ष उपेन्द्र यादवलगायात तत्कालीन संघीय समाजवादी पार्टीका नेताहरू भने एमालेसँग सत्ता गठबन्धनको पक्षमा छैनन् ।
अहिलेको जसपाको आन्तरिक समीकरण पनि एमालेको जस्तै डामाडोल बन्न थालेकाले सत्ता समीकरणमा निर्णायक मानिएको जसपा अन्ततः कतै नजाने र गए पनि 'भ्यागुत्ताको धार्नी' हुने अवस्था देखिएको छ ।
