सरकारको निर्णयअनुरूप सहायता सामग्री लिन राष्ट्रिय ध्वजावाहक नेपाल वायुसेवा निगम (नेपाल एयरलाइन्स) चीनको राजधानी बेइजिङ जाने भएको छ । कोरोनालगायतका अत्यावश्यक स्वास्थ्य सामग्री लिन निगमको वाइड बडी ए३३० जहाजले चीनको ‘बेइजिङ क्यापिटल अन्तर्राष्ट्रिय विमानस्थल’मा यही १५ चैतमा उडान भर्ने भएको हो ।
बेजिङबाट स्वास्थ्य सामग्री लिएर निगमको जहाज भोलिपल्ट राती (सोमबार) काठमाडौँ अवतरण गर्ने निगमको उडान तालिका रहेको निगमका प्रवक्ता करिश्मा श्रेष्ठले जानकारी दिइन् । गत ९ चैतको मन्त्रिपरिषद्को बैठकले मित्र राष्ट्र चीनबाट प्रदान गरिने कोरोनाविरुद्धको खोप ‘भेरासेल’लगायत सहायता सामग्री स्वीकार गर्ने निर्णय गरेको थियो ।
सो सरकारी निर्णयबमोजिम चीन सरकारले उपलब्ध गराउने वस्तुगत अनुदान स्वीकार गर्ने निर्णय भएअनुरूप ८ लाख मात्रा कोरोनाविरुद्धको खोपलगायत सहायता सामग्री लिन निगमको जहाज बेइजिङ जाने तयारी भएको जनाइएको छ ।
बेजिङ क्यापिटल अन्तर्राष्ट्रिय विमानस्थलबाट ढुवानी गर्न कलसाइन आरए४२५१ द्वारा आइतबार काठमाडौँ-बेइजिङ उडान गर्ने निगमको तयारीबमोजिम संस्कृति, पर्यटन तथा नागरिक उड्डयन मन्त्रालयसँग समन्वय भइरहेको छ ।
कोरोना महामारीबाट विश्व अर्थतन्त्र एवं सामाजिक अवस्थामा प्रतिकूल असर परिरहेका बेला पुनः त्यसको नयाँ स्वरूपले थप समस्या सिर्जना गरेको छ । नेपालको परिवेशमा नागरिकसम्म पहिलो मात्राको पहुँच सहज गराउन सङ्घीय सरकार दत्तचित्त भइरहेका सन्दर्भमा निगमले दायित्व निर्वाह गरेको जनाइएको छ ।
सहप्रवक्ता सुलेश मिश्रका अनुसार निगमको वाइड बडी जहाज १५ चैत साँझ ५ः३० बजे काठमाडौँबाट बेइजिङ प्रस्थान गर्नेछ भने भोलिपल्ट बेइजिङको स्थानीय समयअनुसार अपराह्न ४ः३० बजे काठमाडौँका लागि प्रस्थान गर्नेछ । सोही दिन राती ८ः३५ बजे त्रिभुवन अन्तर्राष्ट्रिय विमानस्थलमा जहाज अवतरण गर्नेछ ।
निगमका प्रवक्ता श्रेष्ठले सरकारी निर्णयबमोजिम स्वास्थ्य तथा जनसङ्ख्या मन्त्रालयसँगको समन्वयका आधारमा नेपालीका लागि अत्यावश्यक एवं महत्त्वपूर्ण कोरोनासँग सम्बन्धित स्वास्थ्य सामग्री लिन निगमको वाइड बडी जहाज प्रयोग गरिने निगमको निर्णय भएको र सोहीअनुरूप आन्तरिक गृहकार्य अघि बढेको जानकारी दिइन् । उनका अनुसार निगमको ए३३० जहाज काठमाडौँ-बेइजिङ-काठमाडौँ उडान कुल ब्लक १२ घण्टा ५ मिनेट रहनेछ । निगमले कोरोनाविरुद्धको खोप लिन पहिलो पटक उडान गर्न लागेको हो ।
निगमको जहाजले यसअघि पनि नेपालमा कोरोना महामारी उच्च भएका बेला पनि बेइजिङ तथा ग्वाङ्जाओबाट स्वास्थ्य सामग्री ल्याएको थियो । निगमले अन्तर्राष्ट्रिय गन्तव्यमा २ थान वाइड बडी ए३२० जहाज र २ थान न्यारो बडी ए३३० जहाजमार्फत ७ वटा देशका ९ वटा गन्तव्यमा उडान भर्दै आएको छ ।