सर्वोच्च अदालतले साविकका नेकपा एमाले र माओवादी केन्द्रलाई ब्युँताइदिएपछि सुरु भएको सत्ताको गठजोड टुंगोमा पुग्न नसकिरहेका बेला सतता साझेदार माओवादी केन्द्रले सरकारलाई दिएको समर्थन फिर्ता लिने कि नलिने भन्ने विषयमा छलफल गर्न स्थायी कमिटी बैठक गरेको छ । 

अहिले सिंहदरबारस्थित माओवादी केन्द्रको संसदीय दलको कार्यालयमा स्थायी कमिटी बैठक बसिरहेको छ ।

बैठकमा समसामयिक राजनीतिक विषय र पार्टीको साङ्गठानिक विषयमा छलफल हुने बताइए पनि माओवादी केन्द्रले यसअघि केपी शर्मा ओली नेतृत्वको सरकारलाई दिएको समर्थन फिर्ता गर्ने कि नगर्ने भन्ने विषयमा पनि बैठकमा व्यापक छलफल हुने एक नेताले बताए ।

यसअघि माओवादी केन्द्रले दलहरूसँग छलफलका लागि भन्दै केन्द्रीय समिति बैठक केही दिनका लागि स्थगित गरेको थियो । बैठक स्थगित गरेको एक साता बित्दा पनि दलहरूसँग औपचारिक छलफल गर्न भने सकेको छैन ।

सरकारलाई समर्थन फिर्ता गर्दा पनि माओवादी केन्द्रको जाने ठाउँ निश्चित देखिँदैन किनभने संभावित साझेदार कांग्रेस सरकारमा जाने विषयमा मौन छ भने जसपाले एमालेसँग घाँटी जोड्ने मेसो गरिरहेको छ ।