अमेरिकामा एक बन्दुकधारीले अन्धाधुन्ध गोली प्रहार गरी एक जना प्रहरी अधिकृतसहित कम्तीमा १० जनाको ज्यान लिएका छन् । 

एक सशस्त्र आक्रमणकारीले कोलोराडो राज्यको बोल्डर शहरमा अवस्थित एउटा स्थानीय सुपरमार्केटमा जथाभावी गोली प्रहार गरेका थिए ।

गोली चल्न थालेपछि आफू जोगिन भागाभाग गर्नुपरेको त्यहाँ उपस्थित मानिसहरूले बताएका छन् ।

घटनापछि एउटा पत्रकार सम्मेलनमा बोल्दै बोल्डरका प्रहरी प्रमुख म्यारिस हेरोल्डले एक जना सन्दिग्ध व्यक्तिलाई  हिरासतमा लिइएको र उनको अस्पतालमा उपचार भइरहेको बताएका छन् ।

स्थानीय समयअनुसार दिउँसोको साढे २ बजेतिर भएको उक्त घटनामा किङ सुपर्स भनिने संदिग्ध व्यक्तिले सपिङ सेन्टरमा पसेर गोली चलाएका थिए ।

सो घटनालाई त्यहाँ उपस्थित केही व्यक्तिहरूले सामाजिक संंजालमा लाइभ स्ट्रिमिङ गरेका थिए ।

सामाजिक संजालमा पोस्ट गरिएको माथिबाट खिचिएको एउटा दृश्यमा खुट्टा रगतपच्छे भएका एक व्यक्तिलाई प्रहरीले हत्कडी लगाएर लगिरहेको देखिन्छ ।

अमेरिकी राष्ट्रपति जो बाइडनले गत महिना मात्र हतियार खरिद गर्न चाहनेहरूको पृष्ठभूमिबारे कडाइपूर्वक जाँच गर्ने गरी कानुन ल्याउन सिफारिस गर्ने बताएका थिए ।

अमेरिकामा बारम्बार गोलीकाण्ड हुँदै आएको भए तापनि सरकारले हालसम्म बन्दुक नियन्त्रणको ठोस व्यवस्था गर्न सकेको छैन ।