आगामी सरकारका लागि समीकरण बनाउन नेकपा (एमाले)का अध्यक्ष केपी ओली र जनता समाजवादी पार्टी (जसपा) सहमति नजिक पुगेको बताइएको छ । स्रोतका अनुसार प्रधानमन्त्री ओलीले जसपाले राख्दै आएका माग पूरा गर्ने प्रतिबद्धता जनाएपछि सहकार्य गर्ने स्थिति बन्न लागेको हो ।

विगत केही समय प्रधानमन्त्री ओली र जसपा अध्यक्ष महन्थ ठाकुरका बीच निकै हिमचिम बढेको थियो । एमाले र माओवादी केन्द्र ब्युँताउने अदालतको फैसलापछि उनीहरूबीच पटकपटक भेटघाट र कुराकानी भएको थियो ।

जसपाको मागका सम्बन्धमा अध्ययन र छलफल गर्न सरकारका तर्फबाट अर्थमन्त्री विष्णु पौडेल तथा नेताहरू सुवास नेम्वाङ र राजन भट्टराई र जसपाका तर्फबाट सर्वेन्द्रनाथ शुक्ल र लक्ष्मणलाल कर्ण रहेको कार्यदलसमेत गठन गरिसकेको छ ।

अध्यक्ष ठाकुरले सोही पार्टीका अर्का अध्यक्ष उपेन्द्र यादवसँग समेत छलफल नगरी एकलौटी ढंगले उक्त कार्यदल गठन गरेका थिए । स्रोतका अनुसार कार्यदल सहमति नजिक पुगेको छ ।