भारतीय कम्पनी सेरम इन्ष्टिच्युट अफ इन्डियाले कोरोनाविरुद्धको थप खोप नपठाएकाले पहिलो डोज लगाइसकेकाहरूलाई चिन्तित तुल्याएको छ ।
उक्त कम्पनीले २० लाख मात्रा खोप पठाउने गरी सम्झौता गरेर पैसासमेत लिइसकेको भए तापनि माग बढी भएकाले उत्पादनले धान्न नसकेको उल्लेख गर्दै बाँकी १० लाख मात्रा खोप हाल पठाउन नसक्ने जानकारी गराएको स्वास्थ्य मन्त्रालयले जनाएको छ ।
मन्त्रालयका अनुसार हालसम्म नेपालमा २३ लाख ४८ हजार मात्रा खोप ल्याइएकामा पहिलो चरणको अभियानमा १८ लाख मात्रा खोप खपत भइसकेको छ ।
चीनबाट आउने भनिएको ८ लाख मात्रा भेरोसिल्ड खोप पनि आइपुगेको छैन ।
अब ५ लाख ४८ हजार मात्रा खोप मात्र बाँकी रहेको बताइएको छ । यस्तो अवस्थामा पहिलो डोज लगाइसकेकालाई दोस्रो डोज कसरी उपलब्ध गराउने भन्ने विषयमा सरकारलाई अप्ठ्यारो परेको स्रोत बताउँछ ।
कोरोनाको अर्को पुस्ता फैलिइरहेको र युरोपलगायत विभिन्न देशहरूमा पुनः बन्दाबन्दी गरिइसकिएको अवस्थामा नेपालमा पहिलो डोज लगाइसकेकाले पनि दोस्रो डोज पाउन नसक्ने जोखिमपूर्ण परिस्थिति आयो भने के होला भनेर विज्ञहरू चिन्तित छन् ।
सेरम र अन्य दाताहरूसँग पनि निरन्तर सम्पर्क र संवाद जारी रहेको स्वास्थ मन्त्रालयले जनाएको छ ।
स्मरण रहोस्, पहिलो डोज कोभिसिल्ड लगाएकाले दोस्रो डोज पनि कोभिसिल्ड र पहिलो भेरोसिल्ड लगाएका व्यक्तिहरूले दोस्रो पनि भेरोसिल्ड नै लगाउनुपर्ने चिकित्सकहरूले बताएका छन् । भारतीय कम्पनी सेरमको खोप कोभिसिल्ड हो भने चीनबाट आउने भनिएको खोप भेरोसिल्ड हो ।