आफूविरुद्धको मुद्दाको सुनुवाइसम्म नभई ४० वर्षसम्म भारतीय जेलमा बिताएका इलामका ६१ वर्षीय दुर्गाप्रसाद तिम्सिना उर्फ दीपक जैसीलाई क्षतिपूर्ति उपलब्ध गराउन कोलकाता उच्च अदालतले सोमबार पश्चिम बंगाल सरकारका नाउँमा आदेश जारी गरेको छ ।

उक्त अदालतका न्यायाधीशहरू थोट्टाथिल बी नायर राधाकृष्णन् र न्यायाधीश अनिरुद्र रोयको इजलासले सोमबार दुर्गाप्रसादका परिवारबाट माग भएअनुसार क्षतिपूर्ति दिन पश्चिम बंगाल सरकारलाई आदेश दिएको बताइएको छ ।

सोही इजलासले कोलकाता सेन्ट्रल जेलमा रहेका दिमागी हालत बिग्रिएका बिरामी कैदीहरूको सत्यतथ्यसहित आगामी २५ मार्चभित्र एक रिपोर्ट बुझाउनसमेत जेल प्रशासनलाई आदेश गरेको जनाइएको छ ।

२१ वर्षको उमेरमा एउटा हत्या अभियोगमा थुनामा रहेका दुर्गाप्रसाद ४० वर्षपछि ६१ वर्षको उमेरमा आइतबार इलामको माई नगरपालिका- १० लुम्बाकस्थित आफ्नो घरमा पुगेका थिए ।