सरकारसँग सम्झौता गरेर हठात् शान्तिपूर्ण राजनीतिको मूलधारमा आएका नेपाल कम्युनिस्ट पार्टीका महासचिव नेत्रविक्रम चन्द विप्लवलाई आफ्ना थुनामा रहेका नेता-कार्यकर्ताको चिन्ता लाग्न थालेको छ ।

उनी पक्राउ परेर थुनामा रहेका आफ्ना नेता-कार्यकर्ता रिहा गराउन सरकारलाई आग्रह गरिरहेका छन् ।

सोमबार बालुवाटारमा प्रधानमन्त्री केपी शर्मा ओलीसँग भएको भेटमा पनि विप्लवले सरकार र आफ्नो पार्टीबीच भएको ३ बुँदे सहमतिअनुसार आफ्ना नेता-कार्यकर्ता रिहा गर्न आग्रह गरे ।

विप्लवको आग्रहमा प्रधानमन्त्री ओलीले कारागारमा रहेका नेता-कार्यकर्ता रिहाइका लागि सरकारले काम गरिरहेको भन्दै आश्वासन दिए ।

गत २० फागुनमा सरकार र विप्लव नेतृत्वको नेपाल कम्युनिस्ट पार्टीबीच भएको ३ बुँदे सहमतिमा कारागारमा रहेका विप्लवका नेता-कार्यकर्ता रिहा गर्ने र उनीहरूमाथि लगाइएका सबै मुद्दा खारेज गर्ने उल्लेख छ ।

सहमति भएको ३ साता भइसक्दा पनि आफ्ना नेता-कार्यकर्ताको रिहाइ नभएपछि विप्लव चिन्तित बनेका हुन् ।