आगामी सरकारमा भूमिकाबारे छलफलका लागि भोलि कांग्रेस बैठक
पछिल्लो राजनीतिक अन्योल र गञ्जागोलमा जिम्मेवार राजनीतिक दलहरू नै अनिर्णयका बन्दी बनिरहेका छन् । सत्तारुढ नेकपा एमाले आन्तरिक कलहमा व्यस्त छन् भने सत्ता साझेदार माओवादी केन्द्र पनि एमालेको असन्तुष्ट माधव नेपाल-झलनाथ खनाल खेमाकै पछिपछि ओलीविरुद्ध संघर्षमा छ ।
यस अवस्थामा प्रमुख प्रतिपक्ष कांग्रेस भने चुपचाप बसिरहेको छ- बामपन्थीहरूको लडाइँको रमिता हेरेर । तथापि, कांग्रेसलाई आगामी सरकारको नेतृत्व लिने दबाब पनि परिरहेको छ । कांग्रेस सभापति शेरबहादुर देउवा भने अहिले कांग्रेसले सरकारको नेतृत्व लिनुहुँदैन भन्ने अडानमा छन् ।
यसैबीच नेपाली कांग्रेसले पदाधिकारी र पूर्वपदाधिकारीहरूको बैठक बोलाएको छ ।
क्रियाशील सदस्यता छानबिन समितिका सदस्यहरूसँग छलफल गर्न भन्दै भोलि ९ चैत दिउँसो बैठक बोलाइएको छ ।
कांग्रेस महाधिवेशनको पूर्वनिर्धारित कार्यतालिकाअनुसार १० चैतभित्र एक निर्वाचन क्षेत्र भएका जिल्लाले नयाँ क्रियाशील र एकभन्दा बढी निर्वाचन क्षेत्र भएका जिल्लाले नवीकरणको सूची केन्द्रमा पठाइसक्नुपर्नेछ ।
तर, स्रोतहरूका अनुसार बैठकमा सरकार गठनमा देखिएको अलमल र कांग्रेसको आगामी सरकारमा भूमिकाबारे समेत छलफल हुने बताइएको छ ।