४० वर्ष भारतको जेलमा बसेका दुर्गाप्रसाद स्वदेश आइपुगे

भारतीय जेलमा ४० वर्ष बन्दी जीवन बिताएका इलामका दीपक जैसी भनिने दुर्गाप्रसाद तिम्सिना आइतबार स्वदेश आइपुगेका  छन् ।

कोलकातास्थित नेपाली महावाणिज्य दूतावास र विश्व सेवा विस्तार संस्थाको पहलमा शनिबार दुर्गाप्रसाद शनिबार छुटेका हुन् ।  उनलाई आजै झापामा पत्रकार सम्मेलन गरेर परिवारको जिम्मा लगाइने बताइएको छ । 

भारत पश्चिम बंगालको दमदम करेक्सनल सेन्टर (सेन्ट्रल जेल)मा रहेका उनी कोलकाता उच्च अदालतको आदेशअनुसार शनिबार छुटेका हुन् ।

शारीरिक र मानसिक रूपमा कमजोर उनलाई लिन भाइ प्रकाशचन्द्र दमदम जेल पुगेका थिए । अदालत र प्रकाशचन्द्रबीचको सम्झौतासहितको पत्र शुक्रबार अपराह्न अदालतले जेल पठाएको थियो । त्यही पत्रका आधारमा जेल प्रशासनले उनलाई छाडेको हो ।

कोलकाता उच्च अदालतका मुख्य न्यायाधीशद्वय थोट्टाथिल बी नायर राधाकृष्णन् र न्यायाधीश अनिरुद्र रोयले गत बुधबार साँझ दुर्गाप्रसादलाई छाड्न आदेश दिएका थिए ।

अदालतले उनको मानसिक अवस्था ठीक नभएको भन्दै घरमै राखेर उपचार गर्नसमेत आदेश गरेको छ ।