मनाङ जिल्लाको नासोँ गाउँपालिका- ४ को खोत्रोमा ट्रक दुर्घटना भएको छ । शनिबार दिउँसो भएको उक्त दुर्घटनामा मृत्यु हुनेको संख्या ५ पुगेको छ । प्रहरीका अनुसार घटनास्थलमै ३ जनाको मृत्यु भएको र उपचारका लागि लमजुङ लैैैजाने क्रममा थप २ जनाको बाटोमै मृत्यु भएको थियो ।
दुर्घटना भएको ध१ख ५९२ नम्बरको ट्रक बेँसीशहरबाट सिमेन्ट बोकेर मनाङ सदरमुकाम चामे जाँदै गरेको बताइएको छ । प्रहरीका अनुसार दुर्घटनामा परेर मनाङको नासोँ गाउँपालिका- ४, ओडारगाउँका अन्दाजी ७ वर्षीय लिउन गुरुङ, ३५ वर्षीया मनीषा गुरुङ र २६ वर्षीया जलकाशी गुरुङको घटनास्थलमै मृत्यु भएको थियो । मृतक लिउन मनीषाका छोरा हुन् । मनीषा र जलकाशी दिदी-बहिनी हुन् ।
दुर्घटनामा परी गम्भीर घाइते भएकामध्ये ट्रकका सहचालक लमजुङको मर्स्याङ्दी गाउँपालिका- ५, घेर्मु खोरियाखेतका २१ वर्षीय लक्ष्मण नेपाली र चामे गाउँपालिका- ४ का २८ वर्षीय राजु विकलाई उपचारका लागि जिल्ला अस्पताल बेँसीसहरतर्फ ल्याउँदै गर्दा मृत्यु भएको थियो ।
राती ८ बजे अस्पताल पुर्याउनेबित्तिकै नेपाल र विश्वकर्मालाई चिकित्सकले मृत घोषणा गरेको प्रहरीले जनाएको छ ।
उक्त दुर्घटनाका गम्भीर घाइते ट्रकका चालक तनहुँको भानु नगरपालिका- ३ का २४ वर्षीय सुमन तामाङ, नासोँ गाउँपालिका- ४ का अन्दाजी ३ वर्षीय थिउन गुरुङ र अन्दाजी ७ वर्षीय निहल गुरुङको जिल्ला अस्पताल लमजुङमा प्रारम्भिक उपचारपछि पुरानो मेडिकल कलेज चितवनमा रेफर गरिएको बताइएको छ ।
मृतक ३ जनाको पोस्टमार्टमका लागि जिल्ला अस्पताल, मनाङमा पठाइएको प्रहरीले बताएको छ ।