कांग्रेस सरकारमा नजाने, 'परिआए' नछाड्ने
नेपाली कांग्रेसका सभापति एवं पूर्वप्रधानमन्त्री शेरबहादुर देउवाले अहिले कांग्रेस प्रधानमन्त्री पदका लागि भन्दा पनि पार्टी बनाउन लाग्नुपर्ने बताएका छन् ।
नेपाली कांग्रेस तरुण विभागले आज रत्ननगरमा आयोजना गरेको युवा तरुण जागरण भेलालाई सम्बोधन गर्दै उनले अहिले प्रधानमन्त्री बन्नुभन्दा कांग्रेसलाई निर्वाचनमा पहिलो पार्टी बनाउने समय आएको बताएका हुन् । उहनले भने, 'प्रधानमन्त्री बन्नु भन्दा पार्टी बनाउन लाग्नुपर्छ । टाउकामा जिम्मेवारी आयो भने पछि पर्नेवाला पनि छैन ।'
सभापति देउवाले अहिले नेकपा एमाले र माओवादी केन्द्रको संयुक्त सरकार रहेको र माओवादी केन्द्रले सरकारबाट समर्थन फिर्ता नलिएको भन्दै मधेशवादी दल, माओवादी केन्द्र र नेकपा एमालेका ओली र नेपाल खेमा कसरी अगाडि बढ्छन्, त्यो हेरेर निर्णय लिने बताए ।
सभापति देउवाले निर्वाचनका लागि तयारी गर्न कार्यकर्तालाई निर्देशन पनि दिए । उनले जनता मालिक भएका, नोकर नभएका भन्दै भाषण गरेर मत नदिने, जनताको सुखदुःखमा साथ दिएमा मात्र निर्वाचन जितिने सुझाए । कांग्रेसभित्रको आन्तरिक विवाद टुंग्याएर अघि बढ्ने समय आएको उनको भनाइ थियो ।
सो अवसरमा शहीद परिवारलाई सम्मान पनि गरिएको थियो ।