विगत ४० वर्षदेखि भारतीय जेलमा रहेका नेपाली नागरिक दुर्गाप्रसाद तिम्सिना उर्फ दीपक जैसी शनिबार दिउँसो रिहा भएका छन् । 

शारीरिक र मानसिक रूपमा कमजोर भएका तिम्सिनाले जेलबाट छुट्नेबित्तिकै संक्षिप्त प्रतिक्रिया दिँदै आफू निर्दोष रहेको बताएका थिए ।

भारत पश्चिम बंगालको दमदम करेक्सनल सेन्टरमा रहेका उनी कोलकाता उच्च अदालतको आदेशबमोजिम छुटेका हुन् । 

दुर्गाप्रसादका भाइ प्रकाशचन्द्र तिम्सिना उनलाई लिन दमदम जेल पुगेका थिए । अदालत र प्रकाशचन्द्रबीचको सम्झौतासहितको पत्र शुक्रबार अपराह्न अदालतले जेल पठाएको थियो । त्यही पत्रका आधारमा जेल प्रशासनले उनलाई छाडेको हो ।

गत बुधबार कोलकाता उच्च अदालतका न्यायाधीशहरू थोट्टाथिल बी नायर राधाकृष्णन् र अनिरुद्र रोयको इजलासले उनलाई छाड्न आदेश दिएको थियो । अदालतको आदेशपछि भाइ प्रकाशचन्द्र, दुर्गाका कानुन व्यवसायीहरू तथा सहयोगी संस्था 'विश्व सेवा विस्तार'का प्रतिनिधि इन्द्र बस्नेतलगायतले उनलाई भेटेका थिए ।

दुर्गाका कानुन व्यवसायीहरूका अनुसार  हरेक ६ महिनामा उनको मानसिक अवस्थाका सम्बन्धमा कोलकातास्थित नेपाली महावाणिज्य दूतावासलाई जानकारी गराउनुपर्नेछ । महावाणिज्य दूतावासले पुन: अदालतलाई जानकारी गराउनेछ ।

जुनीभर जेलमा बसेर ४० वर्षपछि  अदालतको आदेशले छाडिएका तिम्सिनाले के कस्तो क्षतिपूर्ति पाउने भन्ने र अभियोजन तथा न्याय प्रणालीको त्रुटि एवं ढिलासुस्तीका कारण भएको पीडित व्यक्तिको मानवअधिकारको हननका सन्दर्भमा भारतीय र नेपाली विज्ञ समुदायमा बहस सुरु भएको छ ।