नेकपा(एमाले)को संसदीय बोर्डको बैठकले गुटगत गतिविधि गर्नेहरूलाई स्पष्टीकरण सोध्ने निर्णय गरेको छ । शनिबार प्रधानमन्त्री निवास बालुवाटारमा बसेको उक्त बोर्डको बैठकले स्पष्टीकरण सोध्ने निर्णय गरेको थियो ।

संसदीय बोर्ड गत ५ चैतमा  गठन भएको थियो । उक्त बोर्डमा वरिष्ठ नेताहरू झलनाथ खनाल र माधवकुमार नेपाललाई पनि राखिएको छ ।

बोर्ड गठन भएपश्चात् पहिलो पटक बसेको बैठकले यस्तो निर्णय गरेको हो ।

यसअघि नेकपा(एमाले) वरिष्ठ नेता माधवकुमार नेपाल र झलनाथ खनाल खेमाका ३ जना सांसद ज्ञापनपत्र बुझाउन प्रधानमन्त्री निवास बालुवाटार पुगेका थिए ।

सांसदहरू सोम पाण्डे, जीवनराम श्रेष्ठ र यज्ञराज सुनुवार ज्ञापनपत्र लिएर बालुवाटार पुगेका हुन् ।

दलका नेता एवं प्रधानमन्त्री केपी शर्मा ओलीले उक्त ज्ञापनपत्र बुझिसकेपछि कुनै गुटगत र सामूहिक रूपमा आएको कुनै प्रस्ताव नस्वीकारिने बताउँदै दलका ती सांसदहरूलाई व्यक्तिगत रूपमा आफ्नो कुरा राख्न आग्रह गरेका थिए । 

नेता ओलीले बोलाएको दलको बैठकमा नेपाल खेमा अनुपस्थित छ । संसदीय दलको बैठक जारी छ ।