शुक्रबार दिउँसो पत्रकार सम्मेलन गरेर महान्यायाधिवक्ता अग्नि खरेलले आफ्नो पदबाट राजीनामा दिएका छन्  ।

प्रधानमन्त्रीलाई भेटेर पदबाट राजीनामा दिएको बताउँदै खरेलले  आफूले ३ वर्षमा गरेका कामको बारेमा यसैगरी पत्रकार सम्मेलन आयोजना गरेर जानकारी दिने उल्लेख गरे । 

८ फागुन २०७४ मा महान्यायाधिवक्ताको पदमा नियुक्त खरेल २०६४ र २०७० सालका संविधानसभा निर्वाचनमा नेकपा (एमाले)को तर्फबाट संविधानसभा सदस्य निर्वाचित भएका थिए । केपी शर्मा ओली नेतृत्वको अघिल्लो सरकारमा कानुनमन्त्रीको जिम्मेवारीमा थिए खरेेल । महान्यायाधिवक्ता हुनुअघि एमालेका पोलिटब्युरो सदस्य रहेका खरेलले एकताका नेपाल बार एसोसिएसनको महासचिवको कार्यभारसमेत सम्हालेका थिए ।

प्रधानमन्त्री केपी ओलीले प्रतिनिधिसभा विघटन गरेको  विरोधमा सर्वोच्च अदालतमा परेका रिटहरूको सुनुवाइका क्रममा पनि खरेलले राजीनामा दिने चर्चा चलेको थियो ।

खरेललाई उक्त मुद्दामा सरकारका तर्फबाट सशक्त प्रतिरक्षा गर्न नसकेको भन्दै आलोचना गरिएको थियो । सोही कारण  प्रधानमन्त्री ओली खरेलसँग असन्तुष्ट भएको र त्यसैलाई लिएर उनले राजीनामा दिन लागेको चर्चा थियो । खरेलले भने त्यसबेला प्रधानमन्त्रीले आफूसँग कुनै असन्तुष्टि व्यक्त नगरेको र आफूले राजीनामा दिने कुरा पनि सत्य नरहेको स्पष्ट पारेका थिए ।