छिट्टै नयाँ सरकार बन्ने प्रचण्डको दाबी
नेकपा (माओवादी केन्द्र)का अध्यक्ष पुष्पकमल दाहाल प्रचण्डले आफू र आफ्नो दल माओवादी केन्द्रको प्रधानमन्त्रीमा दाबी नरहेको बताएका छन् । उनले सरकारको नेतृत्व कसको हुन्छ भन्ने विषयमा दलहरूबीच छलफल भइरहेकाले सहमतिमै नयाँ प्रधानमन्त्री बन्ने उल्लेख गरे ।
सिन्धुलीको सिन्धुलीमाढीमा बिहीबार आयोजित पत्रकार सम्मेलनमा बोल्दै उनले पहिले पनि कांग्रेस र माओवादी केन्द्रले आलोपालो सरकारको नेतृत्व गरी निर्वाचन सम्पन्न गराएको स्मरण गराउँदै प्रधानमन्त्रीको आलोपालो नेतृत्वका लागि आफ्नो दल र कांग्रेसबीच छलफल भइरहे पनि निष्कर्षमा भने नपुगेको उल्लेख गरे ।
दाहालले केन्द्र सरकार फेरबदलको टुंगो नलागेसम्म प्रदेशमा पनि सरकार फेरबदल नभइहाल्ने बताए । एमाले विवादको प्रसंगमा अध्यक्ष दाहालले केपी ओलीले एमालेको नेतृत्व नगरेर गुट चलाएको आरोप लगाउँदै संविधान र परिवर्तनलाई सिध्याएरै छाड्ने प्रधानमन्त्री केपी ओलीको दुस्साहस किमार्थ पूरा नहुने र आफूहरू त्यसका विरुद्ध जुनसुकै स्तरको संघर्ष गर्न तयार रहेको सुनाए ।
पछिल्लो पटक राष्ट्रपतिले बोलाएको चियापानमा केपी ओलीसँग भेट भएको बताउँदै दाहालले ओलीको प्रस्तुति उही लोकतन्त्र र संविधान मास्ने खालकै भएको बताए । प्रधानमन्त्री ओलीले भेट्नका लागि भन्दै आफूलाई टेलिफोन गरेको तर आफूले २ पटक फोन गर्दा पनि नउठाएको उनको भनाइ थियो ।
२७ वर्ष पुरानो सम्बन्धलाई ताजा गर्ने उद्देश्यले बुधबार अनौपचारिक भ्रमणमा आफू सिन्धुली आएको बताउँदै अध्यक्ष दाहालले कम्युनिस्ट एकता भाँड्न एकथरि लागिरहेका बेलामा आफूले नै प्रस्ताव गरेर अध्यक्ष र प्रधानमन्त्री बनाएको व्यक्तिले नै दुर्घटना गराएको भन्दै ओलीको आलोचना गरे ।