भारतमा कोरोना संक्रमण दरमा पुनः तीब्रता, विज्ञहरू चिन्तित
छिमेकी मुलुक भारतमा कोरोना संक्रमण फेरि बढ्न थालेको छ । ८ दिनयता हरेक दिन २० हजारभन्दा बढी कोरोना संक्रमित थपिइरहेको बताउँदै भारतको स्वास्थ्य तथा परिवार कल्याण मन्त्रालयले बिहिवार सार्बजनिक गरेको एक तथ्यांकअनुसार पछिल्लो २४ घण्टामा मात्र ३५ हजार ८७१ नयाँ संक्रमित थपिएका छन्, जुन दैनिक संक्रमितको संख्यामा ३ महिनायताकै उच्च हो ।
यससँगै भारतमा कुल संक्रमितको संख्या १ करोड १४ लाख ७४ हजार नाघेको छ । तीमध्ये १ करोड १० लाख ६३ हजारभन्दा बढी निको भइसकेका छन् । सक्रिय संक्रमितको संख्या २ लाख ५२ हजार २६४ छ । पछिल्लो २४ घण्टामा कोरोनाले १७२ जनाको मृत्यु भएको छ । बिहीबार बिहानसम्म भारतमा कोरोनाले मृत्यु हुनेको संख्या १ लाख ५९ हजार २१६ पुगेको छ ।
केही दिनयता संक्रमितको संख्यामा भइरहेको वृद्धिलाई विज्ञहरूले संक्रमणको दोस्रो लहर हुन सक्ने भन्दै चिन्ता व्यक्त गरेका छन् । माहामारीले पुनः आक्रामक रूप लिन थालेपछि महाराष्ट्रलगायत केही राज्यहरूले विभिन्न स्थानमा लकडाउन र रात्रिकालीन कर्फ्यू आदेश जारी गरिसकेका छन् ।
बढ्दो संक्रमण र खोप अभियानको प्रगतिको समीक्षा गर्न मुख्यमन्त्रीहरूसँग बुधबार भिडियो कन्फरेन्समार्फत छलफल गर्दै प्रधानमन्त्री नरेन्द्र मोदीले कोरोना संक्रमणको अर्को लहरलाई समयमै रोक्नका लागि खोप अभियानलाई तीब्रता दिन मुख्यमन्त्रीहरूलाई निर्देशन दिएका थिए ।
३ माघदेखि खोप अभियान सुरु गरिएको भारतमा हालसम्म ३ करोड ७१ लाख ४३ हजारभन्दा बढीले खोप लगाइसकेका छन् ।