नेकपा एमालेले कर्णाली प्रदेशका मुख्यमन्त्री महेन्द्रबहादुर शाहीलाई दिएको समर्थन फिर्ता लिने निर्णय गरेको छ । आज बसेको संसदीय दलको बैठकले यस्तो निर्णय गरेको हो । एमालेको कर्णाली प्रदेश संसदीय दलको बैठकले एमालेको तर्फबाट सरकारमा सहभागी मन्त्रीहरूलाई फिर्ता हुन निर्देशन पनि दिएको छ ।

कर्णाली प्रदेश सरकारमा एमालेबाट आर्थिक मामिला तथा योजनामन्त्री प्रकाश ज्वाला, सामाजिक विकासमन्त्री दल रावल र उद्योग, पर्यटन वन तथा वातावरणमन्त्री नन्दसिंह बुढा छन् । 

यससँगै अब अन्य प्रदेशमा माओवादीले समर्थन गरेका एमाले नेतृत्वका प्रदेश सरकारमा पनि हलचल हुने अनुमान विश्लेषकहरूले गर्न थालेका छन् । सर्वोच्च अदालतले साविकका एमाले र माओवादीलाई ब्युँताएपछि केन्द्रदेखि प्रदेशसम्मकै राजनीतिक समीकरणमा उथलपुथल आइरहेका बेला अब पार्टीभित्र मात्र नभएर सरकारमा समेत प्रभाव पर्न थालेको छ ।