आज जारी आफ्नो खेमाको राष्ट्रिय कार्यकर्ता भेलालाई सम्बोधन गर्दै नेकपा एमालेका वरिष्ठ नेता माधवकुमार नेपालले अहिले देखिएको सबै समस्याको मूल कारक पार्टी अध्यक्ष केपी शर्मा ओली भएको बताएका  छन् ।

उनले केपी ओलीको अहंकार एवं व्यक्तिवादी चरित्र, गुटगत मनोवृत्ति र भजन मण्डलीको मनोकांक्षाले पार्टीमा समस्या आएको सुनाए।

केपी ओलीकै कारण एमाले र माओवादी केन्द्रबीचको एकता भाँडिएको बताउँदै उनले भने, ‘पछिल्लो समयमा उहाँले पार्टी एकता अगाडि बढाउन नै चाहनुभएन ।’

ओली सधैँ एक पक्षीय भएको र असहमत हुने पक्षलाई पक्षपातपूर्ण व्यवहार गरेको भन्दै उनले एक र्का नेतालाई लडाउने, भिडाउने काम गरेको आरोप पनि लगाए ।

नेता नेपालले ओलीले पार्टी निर्णय र सहमति भएका भन्दा विपरीत काम गरेको उल्लेख गर्दै कुर्सी बचाउन संविधानको अपव्याख्या गरेको समेत दाबी गरे ।

ओलीले पार्टी एकतालाई स्वार्थसिद्धिको साधन बनाएको, जबजको नारा लगाएर निरंकुश प्रवृत्ति देखाएको र आफ्नो गल्तीको दोष सधैँभरी अरूलाई थोपरेको नेता गुनासो गरे ।