नेकपा(एमाले)को असन्तुष्ट खनाल-नेपाल खेमाको २ दिने राष्ट्रिय कार्यकर्ता भेला बुधबार काठमाडौंमा सुरु भएको छ ।
भेलाको अध्यक्षता वरिष्ठ नेता झलनाथ खनालले गरेका छन् भने अर्का वरिष्ठ नेता माधवकुमार नेपाल विशेष अतिथि छन् । देशभरबाट करिब २ हजार नेता, कार्यकर्ता सहभागी हुने बताइएको उक्त भेलामा भीम रावल, अष्टलक्ष्मी शाक्य, गोकर्ण विष्टलगायत नेताहरू पनि सहभागी छन् ।
ओली नेतृत्वका कमीकमजोरी र अबको बाटोबारे अवधारणापत्र प्रस्तुत हुने र त्यसमाथि समूहगत छलफल गरेर पारित गर्ने तयारी गरिएको बताइएको छ ।
भेलामा पार्टी केन्द्रीय कमिटी, केन्द्रीय निकाय र केन्द्रीय विभागका सदस्य, प्रदेश कमिटीका सदस्य, केन्द्रीय कमिटीका पूर्वसदस्य, संघ तथा प्रदेशका सांसद, पूर्वसांसद, जिल्ला कमिटीका पदाधिकारी, सम्पर्क कमिटी र मञ्चका सदस्य, गाउँ तथा नगर कमिटीका अध्यक्ष र सचिव, जिल्ला समन्वय समिति, स्थानीय तहका प्रमुख तथा उपप्रमुख, जनसंगठन तथा पेसागत संगठनका केन्द्रीय सचिवालयका सदस्यका साथै प्रदेश तथा जिल्ला कमिटीका पदाधिकारी सहभागी हुने खनाल-नेपाल निकट स्रोतले उल्लेख गरेको छ ।
उक्त खेमाको भेलालाई 'गुट'को संज्ञा दिएको पार्टी अध्यक्ष तथा प्रधानमन्त्री केपी शर्मा ओली खेमाले भने आपत्ति जनाएको छ । महासचिव ईश्वर पोखरेलले मंगलबार जारी गरेको विज्ञप्तिमा नेकपा (एमाले)ले कुनै भेला आयोजना नगरेको भन्दै नेपाल समूहले जारी गरेको भेलाबारेको सूचनाप्रति गम्भीर ध्यानाकर्षण भएको जनाउँदै उक्त भेलामा काेही नेता, कार्यकर्तालाई नजान र गएमा विधानबमोजिम कारबाही गर्न चेतावनी दिएका थिए ।
ओली खेमाले २८ फागुनमा एकपक्षीय केन्द्रीय कमिटी बैठक बोलाएर महाधिवेशनबाट निर्वाचित भएका नेपाल खेमाका नेताहरूको पद खारेज गरी जिम्मेवारीसमेत खोसिदिएको थियो । त्यसपछि रुष्ट बनेको नेपाल खेमाले छुट्टै राष्ट्रिय भेला बोलाएको हो ।
