अध्यक्ष र महासचिवका धम्की र चेतावनीलाई बेवास्ता गर्दै नेपाल-खनाल
अध्यक्ष केपी शर्मा ओलीको मौखिक र महासचिव ईश्वर पोखरेलको लिखित धम्की र चेतावनीका बाबजुद नेकपा एमाले नेपाल-खनाल खेमाको राष्ट्रिय कार्यकर्ता भेला आजदेखि सुरु हुँदै छ ।
ललितपुरको सानेपामा आज बिहान ११ बजेदेखि भेला सुरु हुने एमाले प्रचार विभागले जानकारी दिएको छ । भोलिसम्म चल्ने भेलामा पार्टी केन्द्रीय कमिटी, केन्द्रीय निकाय र केन्द्रीय विभागका सदस्य, प्रदेश कमिटी सदस्य, केन्द्रीय कमिटीका पूर्वसदस्य, संघ तथा प्रदेशका सांसदलगायत २ हजारभन्दा बढी अगुवा कार्यकर्ताको उपस्थिति रहने बताइएको छ ।
राष्ट्रिय कार्यकर्ता भेलामा पार्टीलाई सुदृढ, एकताबद्ध, क्रियाशील र विधानसम्मत रुपमा अघि बढाउने सम्बन्धमा व्यापक छलफल हुने बताइएको छ । भेलामा केन्द्रीय कमिटीका तर्फबाट अवधारणा पत्र प्रस्तुत गर्ने र त्यसमाथि छलफल गरिने जनाइएको छ। अवधारणपत्रमाथि टोली विभाजन गरी सबै सहभागीले आफ्ना मत राख्ने र पारित गरिनेछ।
ओली खेमाले भने खनाल-नेपालले बोलाएको भेलालाई 'गुटको भेला' भन्दै त्यहाँ नजान नेता कार्यकर्तालाई निर्देशन दिएको छ । पार्टीका अध्यक्ष ओलीले हिजोको चियापानबाटै मौखिक सार्वजनिक निर्देशन दिएका थिए भने महासचिव ईश्वर पोखरेलले हिजो बेलुका विज्ञप्ति जारी गर्दै अनधिकृत र गुटगत भेला नगर्न/नगराउन र त्यसमा सहभागी नहुन एमालेका नेता/कार्यकरालाई निर्देशन दिएका छन् । निर्देशन नमानेर यदि नेपाल-खनालको उक्त भेलामा सहभागी भएमा विधानको व्यवस्था एवं नियमावलीबमोजिम कारबाही गरिने चेतावनी पनि पोखरेलले दिएका छन् ।