नेकपा एमालेका अध्यक्ष एवं प्रधानमन्त्री केपी शर्मा ओली असन्तुष्ट माधव नेपाल-झलनाथ खनाल खेमाप्रति रुष्ट बनेका छन् । हिजो मात्र नेपाल-खनाल खेमालाई फकाउन प्रयास गरेका ओली आजै उनीहरूप्रति आक्रामक बनेका हुन् ।
हिजोको खनाल-नेपाल खेमासँगको भेटमा सो खेमाले ओलीले २८ फागुनमा गरेको आफ्ना खेमाका पदाधिकारीको जिम्मेवारी खोस्ने निर्णय फिर्ता लिनुपर्ने प्रमुख माग राखेको थियो । तर, उक्त मागप्रति ओली उदार नबनेपछि नेपाल-खनाल खेमाले ओलीविरोधी आफ्ना कार्यक्रम र गतिविधिलाई निरन्तरता दिने निर्णय गर्यो ।
सोही निर्णयअनुसार आज बालुवाटारमा अध्यक्ष ओलीले राखेको चियापान बहिष्कार गर्दै पूर्वनिर्णय भएको ४-५ चैतको उक्त खेमाको राष्ट्रिय कार्यकर्ता भेलाको जानकारी दिन भन्दै आज २ बजेका लागि सानेपामा पत्रकार सम्मेलन आयोजना गरेको छ ।
यहीबीच गुटगत भेलामा नजान नेता, कार्यकर्तालाई ओलीले आग्रह गर्दै नेपाल-खनाल खेमालाई संकेत गर्दै उक्त खेमाको नाम भने नलिई केही मानिसहरुले भेला आयोजना गर्दै छन् भन्ने आफूलु सुनेको र एमालेसँग आवद्ध, सम्वद्ध कोही नेता, कार्यकर्तालाई त्यस्ता गुटगत भेला नगर्न र नजान निर्देशन दिएका छन् ।
एमालेभित्रको वर्तमानमा देखिएको किचलोबारे पार्टीका केन्द्रीय सदस्यहरूको मत र मन बुझ्नका लागि आयोजित चियापान समारोहलाई सम्बोधन गर्दै ओलीले केही मानिसहरूले आफूसँग निहुँ खोजिरहेका र भोलि राष्ट्रिय भेला बोलाउने, प्रतिवेदन पास गर्नेे, समानान्तर कमिटी बनाउने भन्ने सुनेको बताए ।
ओलीले अराजकता, विधि, विधानविपरीत काम, एकताविरोधी क्रियाकलापमा कसैलाई छुट नहुने भन्दै नपाल-खनाल खेमालाई धम्की दिन पनि भ्याए । उनले अब अचाक्ली भएको, पार्टीलाई पार्टीका रूपमा चल्न नदिने, भाँडभैलो मच्चाउने गतिविधि हुन नसक्ने बताए ।
