१३ करोड रुपैयाँभन्दा बढी सार्वजनिक सम्पत्ति हिनामिना गरेको अभियोग लागेका काठमाडौँ भ्युटावरका ठेकेदार मनोजकुमार भेटवाललाई विशेष अदालतले १ लाख ९० हजार रुपैयाँ धरौटीमा छाड्न आदेश दिएको छ ।
विशेष अदालतका न्यायाधीशहरू प्रेमराज कार्की, बालेन्द्र रुपाखेती र चन्द्रबहादुर सारुको इजलासले भेटवाललाई धरौटीमा छाड्न आदेश दिएको हो ।
एउटा फाइनान्स लिमिटेडको रकम हिनामिना प्रकरणमा पक्राउ परेका भेटवालसँगै बसन्त मल्ल, विकास श्रेष्ठ, मधुवनलाल श्रेष्ठ, भैरवप्रसाद भेटवाल र रविन लामा पनि धरौटीमा छुटेका छन् ।
४० करोड रुपैयाँभन्दा बढी सम्पत्ति हिनामिना गृएकामा भेटवालसँग १३ करोड २६ लाख रुपैयाँ विगो माग दाबी गरिएको छ । अख्तियार दुरूपयोग अनुसन्धान आयोगले उनलाई १० वर्ष कैद सजायको समेत माग दाबी गरेर फागुन अन्तिम साता विशेष अदालतमा मुद्दा दायर गरेको थियो ।
पुरानो बसपार्कमा काठमाडौं भ्युटावर निर्माण गरिरहेको जलेश्वर स्वच्छन्द बिकोई बिल्डर्स प्रालिका सञ्चालक भेटवालले ४ करोड ६० लाख ४२ हजार ८५० रुपैयाँको अवैध कारोबार गरेको राजस्व अनुसन्धान विभागको निष्कर्ष थियो ।
भेटवालको रिहाइलाई अनेक कोणबाट विश्लेषण गर्न थालिएको छ । यति ठूलो सार्वजनिक सम्पत्तिको हिनामिनामा नाम मात्रको रकम धरौटीबापत लिएर अभियुक्तलाई छाड्ने विषय कतै राज्य संरक्षित अपराधकै निरन्तरता त होइन ? भन्ने प्रश्न पनि उठ्न थालेको छ ।
