ओली-कदमविरुद्ध गर्जिए ११ स्थायी कमिटी सदस्य
नेकपा एमालेका ११ जना स्थायी कमिटी सदस्यहरूले प्रधानमन्त्री तथा एमाले अध्यक्ष केपी शर्मा ओलीको राज्यसत्ता संरक्षित दक्षिणपन्थ र विसर्जनवादका विरुद्ध दृढताका साथ संघर्ष गर्दै अघि बढ्नु अपरिहार्य भएको बताएका छन् । आज एक विज्ञप्ति जारी गर्दै एमालेको माधवकुमार नेपाल र झलनाथ खनाल खेमाका सदस्यले यस्तो बताएका हुन् ।
पार्टीं पंक्तिको अपेक्षा, देशको आवश्यकता र पार्टीको विधान, पद्धति र अभ्यासविपरीत केपी शर्मा ओलीद्वारा सरकारी निवासमा गुटको भेला गरेर त्यसलाई केन्द्रीय कमिटीको विशेष बैठकको नाम दिएर जिम्मेवार नेतालाई पदमुक्त गर्ने, नेताहरूको पदीय जिम्मेवारीमा फेरबदल गर्ने र केही नयाँ व्यक्तिलाई केन्द्रीय कमिटीमा मनोनयन गर्ने अवैध र स्वेच्छाचारी गुटगत कार्य भएको भन्दै विज्ञप्तिमा केन्द्रीय कमिटीका बहुमत सदस्यको उपस्थिति नै नभएको उक्त गुटको भेलाबाट पार्टी विधानको व्यवस्थाविपरीत अवैधानिक रूपमा विधान संशोधन गरिएको कुरा सार्वजनिक भन्दै पार्टीको विधानअनुरूप पार्टी विधानको संशोधन विधान महाधिवेशनले मात्र गर्न सक्ने उल्लेख गरेका छन् ।
प्रधानमन्त्रीसमेतको जिम्मेवारी प्राप्त गरी केपी शर्मा ओलीबाट जनादेशअनुरूप ५ वर्ष बामपन्थी सरकार चलाउने, पार्टीलाई एकताबद्ध गर्दै राष्ट्रिय एकता कायम गर्ने भूमिका निभाउँदै निर्वाचन गर्नुको सट्टा सरकारलाई विघटनतर्फ लैजाने, प्रतिनिधि सभालाई असंवैधानिक रूपमा विघटन गर्ने, बामपन्थी एकता र कम्युनिस्ट पार्टीको एकीकरणलाई समाप्त पार्ने र आफ्नै पार्टी नेकपा एमालेलाई समेत विभाजित गर्दै नेपालको कम्युनिस्ट आन्दोलनलाई नै विसर्जन गर्ने कुकर्मतर्फ काम कुराहरू भएको भन्दै अध्यक्ष ओलीको चर्को आलोचना गरेका छन् ।