आइतबार सिरहाको लहानस्थित मालपोत कार्यालयमा बम विस्फोट हुँदा ७ जना घाइते भए । मालपोत कार्यालयको पहिलो तल्लामा रहेको मोठ शाखामा विस्फोट भएको हो ।
कार्यालका नायब सुब्बा ३८ वर्षीय शिवकुमार यादव र धनगढीमाई नगरपालिका- ४ घर भएका सेवाग्राही ३० वर्षीय दिनेशकुमार भण्डारीको अवस्था गम्भीर भएको बताइएको छ ।
विस्फोटमा परेर विष्णपुर गाउँपालिका, सिरहाका शिवकुमार यादव, गोलबजार नगरपालिकाका भोलाबहादुर मगर, लक्ष्मी राना (३५), बेचनी मगर, फूलकुमारी ठाकुर, सिरहा नगरपालिकाका लालबहादुर बिश्वकर्मा (५२), भगवानपुर गाउँपालिकाका बद्रीनारायण यादव (५४) र धनगढीमाई नगरपालिकाका दिनेश भण्डारी (३५) घाइते भएका सिरहा प्रहरीले जानकारी दिएको छ ।
मालपोत कार्यालय आफैँमा सेवाग्राहीको बढी चाप हुने कार्यालय हो । आइतबार पनि निकै चाप थियो यस कार्यालयमा ।
अनियमितता र भ्रष्टाचारको पर्याय बनेको मालपोत कार्यालयमा कर्मचारी भएको स्थानसम्म सेवाग्राही सहजै पुग्ने गरेका छन् । यही सवाग्राहीलाई मालपोत कार्यालयमा प्राप्त 'विशेषाधिकार'को 'सदुपयोग' गर्दै एक व्यक्ति मालपोतभित्र पसे । कार्यालयको मुख्य कागजात राखिएको स्थानमा पुगेर अपरिचित व्यक्तिले आफ्नो झोला राखे । झोला राखेको स्थानमा कुर्सी थियो ।
उनले राखेको झोला देखे पनि कसैले त्यसलाई अनौठो सोचेनन् किनभने मालपोतमन यस्ता घटना अर्थात 'माल' (घुस) राखिएका झोला दैनिकजसो भित्रिन्छन् ।
झोला राखेर ती व्यक्ति कार्यालयबाहिर जानेबित्तिकै विस्फोट भयो । विस्फोटमा परी ८ जना घाइते भएकामा २ जना गम्भीर भएकाले उपचारका लागि काठमाडौँ ल्याइएको छ ।
बम विस्फोट भएलगत्तै केही समय लहान त्रासद र हाहाकार जस्तो बन्न पुग्यो । रगताम्य कारयालय परिसरका दृश्य सामाजिक सञ्जालमा भाइरल हुन थाले ।
घटना भएको केही समयमै प्रहरी घटनास्थलमा पुग्यो । घटनास्थलमा अनुसन्धानका लागि खटिएको प्रहरीले एउटा पर्चा भेट्टायो र त्यही पर्चाको आधारमा केही प्रहरीलाई अनुसन्धानका लागि अन्य निकायको समन्वयमा विभिन्न स्थानमा सर्च अपरेसन गर्न पठायो ।
प्रहरीले फेला पारेको पर्चा केही समयअघि विशेषगरी तराईमा 'आतंक' मच्चाएर सुस्ताएको ‘गोइत’ समूहको थियो । सोही पर्चाको आधारमा प्रहरीले अन्य टोलीलाई समूहका सदस्य र नाइके खोज्न विभिन्न स्थानमा पठाएको छ । पर्चा धुजाधुजा भएकाले पर्चामा के लेखिएको छ भन्ने कुरा खुल्न बाँकी छ । बम कसले र कतिबेला ल्याएर राखेको कुरा पत्ता लगाउन प्रहरीले अहिले सीसी क्यामेराको फुटेज हेरिरहेको बताइएको छ ।
प्रहरीले घटनास्थलमा भेट्टाएको पर्चा जयकृष्ण गोइत नेतृत्वको भूमिगत संगठन जनतान्त्रिक तराई मुक्ति मोर्चाको पर्चा हो । आइतबार बिहानमात्र गोइत समूहका नेता रामविलास यादवले आत्मसमर्पण गरेका थिए । यादव गोइत समूहका ‘सेकेन्ड म्यान’समेत थिए ।
यादवले साढे १० बजे जिल्ला प्रशासन कार्यालयमा विज्ञप्ति बुझाउँदै आत्मसमर्पण गरेका थिए । यादवको आत्मसमर्पणलाई लिएर नै समूहका असन्तुष्ट पक्षले विस्फोट गराएको हुन सक्ने प्रहरीको प्रारम्भिक अनुसन्धानबाट खुलेको छ ।
यस्तो छ गोइत समूहको आपराधिक विगत
– २७ साउन २०७५ मा विराटनगर महानगरपालिकामा बम विस्फोट, २१ दिनपछि प्रहरीद्वारा समूहका ३ जना पक्राउ गरेर सार्वजनिक ।
– २८ मंसिर २०७४ मा सिरहा लहानको लोकतन्त्र चोक छेउमा बम विस्फोट, सप्तरी खडक नगरपालिका- २ बनरझुल्ला बस्ने ४६ वर्षीय परमेश्वर चौधरी र ४४ वर्षीय धनराज चौधरी घाइते ।
–२३ मंसिर २०७३ मा सिरहाको मिर्चैयामा प्रेसर कुकर बम विस्फोट ।
– १२ मंसिर २०७३ मा जिल्ला प्रशासन कार्यालय सप्तरीमा प्रेसर कुकर बम फेलापरेको ।
– सप्तरीको झुट्की प्रहरी चौकीका असईको हत्या ।
– राजविराजस्थित सांसद सुरेन्द्र यादवको घरमा राखिएको सिलिन्डर बम विस्फोट ।
