बाँकेको कोहलपुर इलाका प्रहरी कार्यालयले ठूलो मात्रामा अवैध हतियार र त्यसमा प्रयोग हुने गोलीसहित एक जनालाई पक्राउ गरेको छ ।

राप्तीसोनारी गाउँपालिका- ५ जब्बरपुरबाट ४ वटा हतियार बरामद गरेको प्रहरीले जनाएको छ । बरामद भएका हतियारमा कटुवा पेस्तोल १ थान, १२ बोरको २ नाले बन्दुक १ थान, भरुवा बन्दुक २ थान छन् ।

हतियारसँगै थ्री नट थ्रीमा लाग्ने गोली २ राउण्ड र एसएलआरमा लाग्ने गोली १ राउण्ड बरामद भएको हो । अवैध हतियार र गोली बरामद भएको घरका धनी ६८ वर्षीय ऋषिराम थारूलाई पक्राउ गरिएको इप्रका कोहलपुरका प्रमुख प्रहरी नायब उपरीक्षक रवीन्द्र खनालले जानकारी दिए । हतियार र गोलीसहित १ जना पक्राउ परेको र घटनाको थप अनुसन्धान भइरहेको खनालले बताए ।

डीएसपी खनालले अपराध रोकथाम र प्रकृतिमा कुनै किसिमको हानि हुन नदिने अभियानलाई निरन्तरता दिइएको बताए ।