बालुवाटारमा प्रधानमन्त्री केपी शर्मा ओली र जनता समाजवादी पार्टीका शीर्ष नेताहरूबीच संंयुक्त सरकार निर्माणका विषयमा बिहीबार बेलुका छलफल भएको छ ।
सत्ता साझेदारीका लागि यी २ दलका शीर्ष नेताहरूबीच भएको छलफलपछि जसपाका नेताहरू प्रधानमन्त्री ओलीलाई भेट्न पुगेका थिए । भेटवार्तामा प्रधानमन्त्री ओलीसँग सहकार्य गर्न जसपाले कैलालीका सांसद रेशम चौधरीको मुद्दा फिर्ता र रिहाइ गर्नुपर्ने, मधेस आन्दोलन, टीकापुरलगायतका घटनामा झुटा मुद्दा लगाइएका व्यक्तिको मुद्दा फिर्ता गर्नुपर्ने, पूर्वन्यायाधीश गिरीशचन्द्र लालको संयोजकत्वमा गरिएको टीकापुर घटनाको न्यायिक छानबिन प्रतिवेदन सार्वजनिक गर्नुपर्ने माग राखेको छ ।
यसरी नै सत्ता साझेदारीसँगै संविधान संशोधनको प्रस्ताव दर्ता हुनुपर्ने माग पनि जसपाले अघि सारेको छ । यी माग पूरा भएमा मात्र एमाले नेतृत्वको सरकारमा पनि सामेल हुने अडान जसपाको छ ।
जसपाका शीर्ष नेताले राखेका सर्तप्रति प्रधानमन्त्री ओली सकारात्मक र गम्भीर रहेको स्रोतले बतायो ।
प्रधानमन्त्री ओलीलाई भेट्न जसपाका अध्यक्षद्वय महन्थ ठाकुर र उपेन्द्र यादव, नेताहरू राजेन्द्र महतो, अशोक राईलगायतका शीर्ष नेता बालुवाटार पुगेका थिए ।
एमाले-जसपा सत्ता साझेदारीका लागि गृहकार्य गर्न ५ सदस्यीय कार्यदल गठन पनि भएको छ । कार्यदलमा जसपाका तर्फबाट सर्वेन्द्रनाथ शुक्ला र लक्षमणलाल कर्ण छन् भने एमालेका तर्फबाट संदीय दलका उपनेता सुवास नेम्वाङ, उपमहासचिव विष्णु पौडेल र प्रधानमन्त्रीका सल्लाहकार राजन भट्टराई रहेका छन् ।